രണ്ട് ദിവസം മുന്‍പ് കൊച്ചിയിലെ ലുലു മാളില്‍ പ്രേക്ഷകരെ ആവേശകടലിലാഴ്ത്തിയ ദുല്‍ഖര്‍ സല്‍മാന്‍, കഴിഞ്ഞ ദിവസം ഇളക്കി മറിച്ചത് ദുബായ് ഗ്ലോബല്‍ വില്ലേജിനെ. തന്റെ ഏറ്റവും പുതിയ ചിത്രമായ ലക്കി ഭാസ്‌കറിന്റെ പ്രചരണാര്‍ത്ഥം കഴിഞ്ഞ ദിവസം ദുബായ് ഗ്ലോബല്‍ വില്ലേജിലെത്തിയ ദുല്‍ഖര്‍ സല്‍മാനെ വരവേല്‍ക്കാനെത്തിയത് ജനസമുദ്രം. ചിത്രത്തിലെ നായികയായ മീനാക്ഷി ചൗധരിയും ദുല്‍ഖറിനൊപ്പം ഉണ്ടായിരുന്നു. ആരാധകരുടെ ഈ സ്നേഹവും വരവേല്‍പ്പും തന്നെ ഏറെ ആവേശം കൊള്ളിക്കുന്നു എന്ന് പറഞ്ഞ ദുല്‍ഖര്‍, വേദിയില്‍ നായിക മീനാക്ഷിക്കൊപ്പം നൃത്തം വെക്കുകയും ചെയ്തു. കേരളത്തിന് പുറമെ ഗള്‍ഫിലും ദുല്‍ഖര്‍ സല്‍മാനുള്ള ജനപ്രീതിക്ക് അടിവരയിടുന്നതായിരുന്നു ദുബായ് ഗ്ലോബല്‍ വില്ലേജിലെ വര്‍ണ്ണ ശബളമായ ഇവന്റില്‍ എത്തിയ ജനസമുദ്രം.
കൊച്ചി, ദുബായ് എന്നിവക്ക് ശേഷം, ചിത്രത്തിന്റെ പ്രൊമോഷന്‍ ഇവന്റുകള്‍ ചെന്നൈ, ഹൈദരാബാദ് എന്നീ നഗരങ്ങളില്‍ വെച്ചും നടക്കും. ദുല്‍ഖര്‍ സല്‍മാന്‍ നായകനായ പാന്‍ ഇന്ത്യന്‍ തെലുങ്ക് ചിത്രമായ ലക്കി ഭാസ്‌കര്‍ ഒക്ടോബര്‍ 31 ന് ദീപാവലിക്കാണ് ആഗോള റിലീസായെത്തുക. കേരളത്തിലും ഗള്‍ഫിലും ഈ ചിത്രം വമ്പന്‍ റിലീസായി വിതരണം ചെയ്യുന്നത് ദുല്‍ഖര്‍ സല്‍മാന്റെ വേഫെറര്‍ ഫിലിംസാണ്. വേഫെറര്‍ ഫിലിംസ് ഗള്‍ഫില്‍ ആദ്യമായി വിതരണം ചെയ്യുന്ന ചിത്രമാണ് ലക്കി ഭാസ്‌കര്‍. തെലുങ്ക്, മലയാളം, തമിഴ്, ഹിന്ദി ഭാഷകളില്‍ ചിത്രം പ്രദര്‍ശനത്തിനെത്തും.
വെങ്കി അറ്റ്‌ലൂരി സംവിധാനം ചെയ്ത്, സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റര്‍ടൈന്‍മെന്റ്‌സും ഫോര്‍ച്യൂണ്‍ ഫോര്‍ സിനിമാസും ചേര്‍ന്ന് നിര്‍മ്മിച്ച ഈ ചിത്രം അവതരിപ്പിക്കുന്നത് ശ്രീകര സ്റ്റുഡിയോസ്. ഒരു സാധാരണക്കാരന്റെ ജീവിതത്തിലെ അസാധാരണമായ കഥ പറയുന്ന ചിത്രം, 1980-90 കാലഘട്ടത്തിലെ മുംബൈ നഗരത്തിന്റെ പശ്ചാത്തലത്തില്‍ ഒരുക്കിയ ഒരു പീരീഡ് ഡ്രാമ ത്രില്ലറാണ്. ഒക്ടോബര്‍ 21 ന് റിലീസ് ചെയ്ത ചിത്രത്തിന്റെ ട്രൈലെര്‍ യൂട്യൂബില്‍ ട്രെന്‍ഡിങ് ആയി മാറിയിരുന്നു. വലിയ പ്രതീക്ഷകളോടെയാണ് ആരാധകരും സിനിമാ പ്രേമികളും ചിത്രം കാത്തിരിക്കുന്നത്.
Recent Comments