ദുല്‍ഖര്‍ സല്‍മാനെ നായകനാക്കി ഒരുക്കുന്ന പാന്‍ ഇന്ത്യന്‍ ചിത്രത്തിന്റെ ടൈറ്റില്‍ പ്രഖ്യാപിച്ചു. ‘ലക്കി ഭാസ്‌കര്‍’ എന്നാണ് സിത്താര എന്റര്‍ടെയ്ന്‍മെന്റ് ഒരുക്കുന്ന ചിത്രത്തിന്റെ പേര്. സീതാരാമത്തിനു ശേഷം ദുല്‍ഖര്‍ സല്‍മാനും ധനുഷ് ചിത്രം വാത്തിക്കു ശേഷം വെങ്കി അറ്റ്‌ലൂരിയും ഒന്നിക്കുന്ന ചിത്രമാണിത്.
സിനിമാ പ്രേമികള്‍ക്ക് തിയറ്ററില്‍ മികച്ച അനുഭവം സമ്മാനിക്കുന്ന ചിത്രമായിരിക്കും ഇത്. ‘അവിശ്വസനീയമായ ഉയരങ്ങളിലേക്കുള്ള ഒരു സാധാരണ മനുഷ്യന്റെ വളര്‍ച്ച’ പ്രമേയമാക്കിയാണ് ചിത്രം ഒരുക്കുന്നതെന്ന് ചിത്രത്തിന്റെ നിര്‍മാതാക്കള്‍ പറയുന്നു.
സൂര്യദേവര നാഗ വംശിയും സായ് സൗജന്യയും ചേര്‍ന്ന് സിത്താര എന്റര്‍ടെയ്ന്‍മെന്റ്‌സിന്റെയും ഫോര്‍ച്യൂണ്‍ ഫോര്‍ സിനിമാസിന്റെയും ബാനറുകളിലാണ് ലക്കി ഭാസ്‌കര്‍ നിര്‍മ്മിക്കുന്നത്. ശ്രീകര സ്റ്റുഡിയോസാണ് ചിത്രം അവതരിപ്പിക്കുന്നത്. ജന്മദിനത്തില്‍ ഈ സിനിമ ദുല്‍ഖറിന് ഒരു ലക്കി ആകട്ടെ എന്നാണ് ടൈറ്റിലിനോട് ആരാധര്‍ പ്രതികരിക്കുന്നത്. കേരളത്തില്‍ ദുല്‍ഖറിന്റെ ഉടമസ്ഥതയിലുള്ള വേഫേറെര്‍ ഫിലിംസ് ആണ് വിതരണം നിര്‍വഹിക്കുന്നത്.
ദേശീയ അവാര്‍ഡ് ജേതാവും വാത്തിക്ക് വേണ്ടി ചാര്‍ട്ട്ബസ്റ്റര്‍ ആല്‍ബം ഒരുക്കുകയും ചെയ്ത ജിവി പ്രകാശ് കുമാറാണ് ചിത്രത്തിന് സംഗീതം നല്‍കുന്നത്. മറ്റൊരു ദേശീയ അവാര്‍ഡ് ജേതാവായ നവീന്‍ നൂലിയാണ് എഡിറ്റിംഗ് നിര്‍വഹിക്കുന്നത്. കൂടുതല്‍ വിശദാംശങ്ങള്‍ നിര്‍മ്മാതാക്കള്‍ ഉടന്‍ പ്രഖ്യാപിക്കും. വെങ്കി അറ്റ്‌ലൂരി തന്നെയാണ് ചിത്രത്തിന്റെ രചനയും സംവിധാനവും നിര്‍വഹിക്കുന്നത്. കലാസംവിധാനം: വിനീഷ് ബംഗ്ലാന്‍, പി ആര് ഓ പ്രതീഷ് ശേഖര്‍.
Recent Comments