ഫഹദിന്റെ ഒരു സിനിമയിറങ്ങുമ്പോള്‍ ആ സിനിമയുടെ സ്വഭാവം എന്തായിരിക്കുമെന്ന് ഫഹദിന്റെ കഥാപാത്രത്തിന്റെ കണ്ണുകളിലെ ചലനങ്ങളില്‍നിന്നും വായിച്ചെടുക്കാമെന്ന് പൊതുവെ പറയാറുണ്ട്. ഈ ഒരു വിഷയത്തെ ഊട്ടിയുറപ്പിച്ചിരിക്കുകയാണ് പാച്ചുവും അത്ഭുതവിളക്കും എന്ന സിനിമയുടെ ട്രെയിലര്‍. ഏറെ പ്രതീക്ഷയേകുന്ന ട്രെയിലറിന് വന്‍ സ്വീകരണമാണ് ലഭിച്ചുകൊണ്ടിരിക്കുന്നത്.
മുംബൈയില്‍ ജനിച്ചുവളര്‍ന്ന ഒരു മലയാളി യുവാവിന്റെ കേരളത്തിലേക്കുള്ള യാത്രയ്ക്കിടയില്‍ നടക്കുന്ന സംഭവങ്ങളെ ഏറെ രസകരമായി നര്‍മ്മത്തില്‍ പൊതിഞ്ഞ് അവതരിപ്പിക്കുന്ന ചിത്രമായാണ് പാച്ചുവും അത്ഭുത വിളക്കുമെത്തുന്നത്. കുസൃതിയൊളിപ്പിച്ച കണ്ണുകളും രസകരമായ ശരീരഭാഷയും ചിരിപ്പിക്കുന്ന സംഭാഷണങ്ങളുമൊക്കെയായാണ് ഫഹദ് ട്രെയിലറില്‍ നിറഞ്ഞുനില്‍ക്കുന്നത്. സത്യന്‍ അന്തിക്കാടിന്റെ മകന്‍ അഖില്‍ സത്യന്‍ കഥയും തിരക്കഥയും എഴുതി സംവിധാനവും എഡിറ്റിംഗും നിര്‍വ്വഹിച്ചിരിക്കുന്നത്.
ഫഹദിനെ കൂടാതെ വിജി വെങ്കടേഷ്, അഞ്ജന ജയപ്രകാശ്, ധ്വനി രാജേഷ്, മുകേഷ്, ഇന്നസെന്റ്, വിനീത്, ഇന്ദ്രന്‍സ്, നന്ദു, അല്‍ത്താഫ് സലിം, മോഹന്‍ ആകാഷെ, ഛായാ കദം, പീയൂഷ് കുമാര്‍, അഭിറാം രാധാകൃഷ്ണന്‍, അവ്യുക്ത് മേനോന്‍ തുടങ്ങി നിരവധി താരങ്ങളാണ് ചിത്രത്തില്‍ അഭിനയിച്ചിരിക്കുന്നത്. മലയാളത്തിലെ സീനിയേഴ്‌സായ ഇന്നസെന്റിനും മുകേഷിനും ഇന്ദ്രന്‍സിനും നന്ദുവിനുമൊക്കെയൊപ്പമുള്ള ഫഹദിന്റെ കോമ്പിനേഷന്‍ സീനുകളും ചിത്രത്തില്‍ ആവോളമുണ്ടാകുമെന്നാണ് ട്രെയിലറിലൂടെ അറിയാന്‍ കഴിയുന്നത്.
ഫുള്‍ മൂണ്‍ സിനിമയുടെ ബാനറില്‍ സേതു മണ്ണാര്‍കാടാണ് പാച്ചുവും അത്ഭുതവിളക്കും നിര്‍മിക്കുന്നത്. കലാസംഗം റിലീസാണ് ചിത്രം തിയേറ്ററുകളിലെത്തിക്കുന്നത്.
Recent Comments