മഞ്ഞുമ്മല്‍ ബോയ്‌സ് സിനിമ കണ്ടിറങ്ങിയവരുടെ മനസില്‍ നിന്ന് ആ 11 പേരും ഒരിക്കലും മായില്ല. സര്‍വൈവല്‍ ത്രില്ലറാണ് സിനിമയെങ്കിലും കുറച്ച് രസകരമായ രംഗങ്ങളും സിനിമയുടെ തുടക്കത്തിലുണ്ട്. അതിലൊന്നാണ് മഞ്ഞുമ്മലിലെ പിള്ളേര്‍ കൊടൈക്കനാലിലേക്ക് യാത്ര പോകാന്‍ തുടങ്ങുന്ന രംഗങ്ങള്‍. കൃത്യം എണ്ണം ആളുകളുമായി യാത്ര ആരംഭിക്കുമ്പോഴാണ് ബൈക്കില്‍ ഒരാള്‍ പാഞ്ഞെത്തുന്നത്. അനിയന്‍ സിക്‌സനെ വണ്ടിയില്‍ നിന്ന് തൂക്കി വെളിയിലേക്ക് എറിഞ്ഞ് കൊടൈക്കനാല്‍ യാത്രയ്ക്ക് ഇടിച്ചു കയറിയെത്തിയ സിജു. ആരെയും കൂസാത്ത ഈ സിജു ആരാണെന്ന് ആരാധകര്‍ക്ക് പോലും ഒറ്റ നോട്ടത്തില്‍ മനസ്സിലായില്ല. അത് മറ്റാരുമല്ല, സംവിധായകനും നടനുമായ ജീന്‍ പോള്‍ ലാല്‍ ആയിരുന്നു സിക്‌സന്റെ ചേട്ടന്‍ സിജു ആയി എത്തിയത്. താടിയെടുത്ത് ജീന്‍ പോള്‍ എത്തിയപ്പോള്‍ സിജുവിനെ അവതരിപ്പിച്ചത് ജീന്‍ പോള്‍ തന്നെയാണെന്ന് മനസിലാക്കാന്‍ സിനിമാപ്രേമികള്‍ പോലും കുറച്ച് താമസിച്ചു.
ചിത്രത്തിലെ ഏറ്റവും ലൗഡ് ആയിട്ടുള്ള കഥാപാത്രയമായിരുന്നു ബാലു വര്‍ഗീസ് അവതരിപ്പിച്ച സിക്‌സന്‍. സിക്‌സന്റെ ചേട്ടന്‍ സിജു ആയിട്ടാണ് ജീന്‍ പോള്‍ ചിത്രത്തിലെത്തിയത്. ആരെയും കൂസാത്ത, പേടിക്കാത്ത, നെഞ്ചും വിരിച്ച് എന്തിനെയും നേരിടുന്ന കഥാപാത്രം. അടിപൊളിയായി സിജു സ്‌ക്രീനില്‍ നിറഞ്ഞാടിയെങ്കിലും ഇത് ആരാണെന്ന് പെട്ടെന്ന് പ്രേക്ഷകര്‍ക്ക് മനസിലായില്ല എന്നതാണ് യാഥാര്‍ത്ഥ്യം. ഏതായാലും അസാമാന്യ പ്രകടനം ഓരോരുത്തരും കാഴ്ചവെച്ച സിനിമയില്‍ ഗംഭീര പ്രകടനമാണ് ജീന്‍ പോളും നടത്തിയത്. ടോവിനോ തോമസിനെ നായകനാക്കി ഒരുക്കുന്ന ‘നടികര്‍’ ആണ് ജീന്‍ പോളിന്റെ സംവിധാനത്തില്‍ ഒരുങ്ങുന്ന അടുത്ത ചിത്രം.
2006ല്‍ കൊടൈക്കനാലില്‍ നടന്ന ഒരു യഥാര്‍ത്ഥ സംഭവമാണ് മഞ്ഞുമ്മല്‍ ബോയ്‌സ് എന്ന പേരില്‍ തിയറ്ററുകളില്‍ എത്തിയിരിക്കുന്ന ചിത്രം. തിരക്കഥ എഴുതി ചിത്രം സംവിധാനം ചെയ്തിരിക്കുന്നത് ചിദംബരം ആണ്. സൗബിന്‍ ഷാഹിര്‍, ശ്രീനാഥ് ഭാസി, ബാലു വര്‍ഗീസ്, ഗണപതി, ജീന്‍ പോള്‍ ലാല്‍, ചന്തു സലീംകുമാര്‍, അഭിറാം രാധാകൃഷ്ണന്‍, ദീപക് പറമ്പോല്‍, ഖാലിദ് റഹ്‌മാന്‍, അരുണ്‍ കുര്യന്‍, വിഷ്ണു രഘു തുടങ്ങി പ്രേക്ഷകരുടെ പ്രിയ താരങ്ങള്‍ അണിനിരന്ന ചിത്രമാണ് മഞ്ഞുമ്മല്‍ ബോയ്‌സ്. കൊച്ചിയിലെ മഞ്ഞുമ്മല്‍ എന്ന നാട്ടില്‍ നിന്ന് കൊടൈക്കനാലിലേക്ക് ഒരു സുഹൃദ് സംഘം യാത്ര പോവുന്നതും അവിടെ നിന്ന് അവര്‍ക്ക് അഭിമുഖികരിക്കേണ്ടി വന്ന അപ്രതീക്ഷിത സാഹചര്യങ്ങളുമാണ് ചിത്രത്തിന്റെ പ്രമേയം. സുഷിന്‍ ശ്യാം ആണ് ചിത്രത്തിന്റെ സംഗീതം. ഷൈജു ഖാലിദ് ഛായാഗ്രഹണം. പറവ ഫിലിംസും ശ്രീ ഗോകുലം മൂവിസും ചേര്‍ന്നാണ് ചിത്രം പ്രേക്ഷകര്‍ക്ക് മുന്നിലെത്തിച്ചത്. ബാബു ഷാഹിര്‍, സൗബിന്‍ ഷാഹിര്‍, ഷോണ്‍ ആന്റണി എന്നിവര്‍ ചേര്‍ന്നാണ് നിര്‍മ്മിച്ചത്.
Recent Comments