മണികണ്ഠന്‍ ആചാരി, നന്ദു ആനന്ദ് എന്നിവരെ കേന്ദ്ര കഥാപാത്രങ്ങളാക്കി ഗിരീഷ് പിസി പാലം രചനയും സംവിധാനവും നിര്‍വ്വഹിച്ച ‘ഴ’ യുടെ ഫസ്റ്റ് ലുക്ക് പോസ്റ്റര്‍ അണിയറപ്രവര്‍ത്തകര്‍ മലയാളത്തിന്റെ പ്രിയതാരങ്ങളുടെ ഫെയ്‌സ് ബുക്ക് പേജിലൂടെയും സോഷ്യല്‍ മീഡിയയിലൂടെയും പുറത്തുവിട്ടു.
തീവ്രമായൊരു സൗഹൃദത്തിന്റെ കഥ പറയുന്ന ചിത്രമാണിത്. സ്വന്തം ജീവനേക്കാള്‍ തന്റെ സുഹത്തിനെ സ്‌നേഹിക്കുന്ന രണ്ട് യുവാക്കളുടെ തീക്ഷ്ണവും തീവ്രവുമായ സൗഹൃദത്തിന്റെ കഥയാണ് ചിത്രത്തില്‍ പറയുന്നത്. തമാശയും സസ്‌പെന്‍സും ത്രില്ലും ഇഴപിരിയാതെ പോകുന്ന സിനിമ ഒരു കുടുംബ പശ്ചാത്തലത്തിന്റെ കഥ കൂടി പറയുന്നുണ്ട്. മനുഷ്യബന്ധങ്ങളില്‍ ഇങ്ങനെയും സൗഹൃദങ്ങള്‍ ഉണ്ടോ എന്ന ചോദ്യത്തിനുള്ള ഉത്തരം കൂടിയാണ് ‘ഴ’യുടേത്.
നൈറാ നീഹാര്‍, സന്തോഷ് കീഴാറ്റൂര്‍, ലക്ഷിമി പ്രിയ, രാജേഷ് ശര്‍മ്മ, ഷൈനി സാറ,വിജയന്‍ കാരന്തൂര്‍, അജിത വി.എം., അനുപമ വി.പി. എന്നിവരാണ് മറ്റ് അഭിനേതാക്കള്‍.
വോക്ക് മീഡിയയുയും നന്ദന മുദ്ര ഫിലിംസിന്റെയും ബാനറില്‍ രാജേഷ് ബാബുവാണ് ചിത്രം നിര്‍മ്മിക്കുന്നത്. സബിത ശങ്കര്‍, വി പ്രമോദ്, സുധി എന്നിവരാണ് സഹനിര്‍മ്മാതാക്കള്‍. ഛായാഗ്രഹണം ഹുസൈന്‍ അബ്ദുള്‍ ഷുക്കൂര്‍, സംഗീതം രാജേഷ് ബാബു കെ, അസോസിയേറ്റ് ഡയറക്ടര്‍ ഷാജി നാരായണന്‍, പ്രൊഡക്ഷന്‍ കണ്‍ട്രോളര്‍ സുധി പി സി പാലം, എഡിറ്റിംഗ് പ്രഹ്‌ളാദ് പുത്തന്‍ചേരി, സ്റ്റില്‍സ് രാകേഷ് ചിലിയ, കല -വിപി സുബീഷ്, പിആര്‍ഒ പിആര്‍ സുമേരന്‍.
Recent Comments