സംഗീത സംവിധായകന്‍ ശ്രീജിത്ത് ഇടവന ആദ്യമായി സംവിധാനം ചെയ്യുന്ന സിക്കാഡയിലെ ആദ്യ മലയാള വീഡിയോ ഗാനം റിലീസായി. അപര്‍ണ രാജീവും ശ്രീജിത്തും ചേര്‍ന്ന് പാടിയ ‘തുലാമഴ തൊടാതെ ….’എന്നു തുടങ്ങുന്ന പാട്ട് ടി സീരിസിലൂടെയാണ് ആസ്വാദകരിലേക്ക് എത്തുന്നത്. വിവേക് മുഴക്കുന്നതിന്റെ വരികള്‍ക്ക് ശ്രീജിത്ത് ഇടവന തന്നെയാണ് സംഗീതം നല്‍കിയത്. നാലു ഭാഷകളില്‍ പുറത്തിറങ്ങുന്ന സിനിമയിലെ പാട്ടുകള്‍ക്കും പ്രത്യേകതകളുണ്ട്. ലോകസിനിമയില്‍ ആദ്യമായി മലയാളം, തമിഴ്, തെലുങ്ക്, കന്നഡ എന്നിങ്ങനെ ഓരോ ഭാഷയിലും നാല് വ്യത്യസ്ത രാഗങ്ങളിലാണ് ഗാനങ്ങള്‍ ചിട്ടപ്പെടുത്തിയിരിക്കുന്നു. മറ്റു ഭാഷകളില്‍ ഇതിനോടകം പുറത്തിറങ്ങിയ പാട്ടുകളെല്ലാം ശ്രദ്ധേയമായി കഴിഞ്ഞു.
നിരവധി ചിത്രങ്ങള്‍ക്ക് സംഗീതസംവിധാനം നിര്‍വഹിച്ച ശ്രീജിത്തിന്റെ സൂപ്പര്‍ ഹിറ്റ് ഗാനങ്ങളുടെ പട്ടികയിലേക്ക് പുതിയ ഗാനവും ഇടം പിടിക്കും എന്നാണ് അണിയറ ശില്പികളുടെ പ്രതീക്ഷ. താരം പതിപ്പിച്ച കൂടാരം, കാതല്‍ എന്‍ കവിയെ, മെല്ലെ വന്നു കൊഞ്ചിയോ തുടങ്ങിയ ജനപ്രിയ ഗാനങ്ങളിലൂടെയാണ് സംഗീതരംഗത്ത് ശ്രീജിത്ത് കയ്യൊപ്പ് ചാര്‍ത്തിയത്.
തീര്‍ണ ഫിലിംസ് ആന്റ് എന്റര്‍ടൈന്‍മെന്റിന്റെ ബാനറില്‍ വന്ദന മേനോന്‍, ഗോപകുമാര്‍ പി എന്നിവര്‍ചേര്‍ന്നാണ് സിക്കാഡ നിര്‍മിക്കുന്നത്. പ്രമുഖതാരങ്ങള്‍ അണിനിരക്കുന്ന ഈ സിനിമയിലൂടെ യുവനടന്‍ രജത് മേനോന്‍ പത്തു വര്‍ഷത്തിനുശേഷം പുതിയ ഗെറ്റപ്പില്‍ തിരിച്ചെത്തുകയാണ്. 2018, തലൈനഗരം 2 ഉള്‍പ്പെടെ തെന്നിന്ത്യന്‍ സിനിമയില്‍ സ്വഭാവവേഷങ്ങളിലൂടെ തിളങ്ങുന്ന ജെയ്‌സ് ജോസ് പള്ളിപ്പാടന്‍ കരുത്തുറ്റ കഥാപാത്രത്തെ അവതരിപ്പിക്കുന്നു. ഗായത്രി മയൂര നായികയാകുന്നു.
Recent Comments