ഫ്രൈഡേ ഫിലിംസിന്റെ ബാനറില്‍ വിജയ് ബാബു നിര്‍മ്മിക്കുന്ന ഇരുപതാമത്തെ ചിത്രത്തിന്റെ ഷൂട്ടിംഗ് ആലപ്പുഴ മാരാരി ബീച്ചില്‍ ആരംഭിച്ചു. സാജിദ് യാഹ്യയാണ് ചിത്രം തിരക്കഥ എഴുതി സംവിധാനം ചെയ്യുന്നത്. മഞ്ജു വാര്യര്‍ കേന്ദ്രകഥാപാത്രത്തെ അവതരിപ്പിച്ച മോഹന്‍ലാല്‍ എന്ന ചിത്രത്തിനു ശേഷം സാജിദ് യാഹ്യ സംവിധാനം ചെയ്യുന്ന ചിത്രം കൂടിയാണിത്.
ആലപ്പുഴ ബീച്ചിന്റെ പശ്ചാത്തലത്തില്‍ പറയുന്ന അതീവ ഹൃദ്യമായ ഒരു പ്രണയ കഥയാണ് ഇത്. ചിത്രത്തിന് ഇനിയും പേരിട്ടിട്ടില്ല.
രഞ്ജിത്ത് സജീവ്, നെഹാ നസ്‌നീന്‍ എന്നീ പുതുമുഖങ്ങളാണ് ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്. ഫ്രൈഡേ ഫിലിംസ് നിര്‍മ്മിച്ച അങ്കമാലി ഡയറീസ്സിനു ശേഷം പുതുമുഖങ്ങള്‍ക്ക് പ്രാധാന്യം നല്‍കി ചിത്രീകരിക്കുന്ന സിനിമ കൂടിയാണിത്. ഇരുപത്തിയഞ്ചോളം പുതുമുഖങ്ങള്‍ ചിത്രത്തില്‍ അഭിനയിക്കുന്നു. ഓഡിഷനിലൂടെ തെരഞ്ഞെടുത്ത ഇവര്‍ക്കു വേണ്ടി രണ്ടാഴ്ചത്തെ പരിശീലനവും നല്‍കിയിരുന്നു.
സിദ്ദിഖ്, ലെന എന്നിവരും ചിത്രത്തില്‍ അഭിനയിക്കുന്നു. 70 ദിവസത്തെ ചിത്രീകരണമാണ് പ്ലാന്‍ ചെയ്തിരിക്കുന്നത്. 12 ഗാനങ്ങളാണ് ചിത്രത്തിലുള്ളത്. സുഹൈല്‍ കോയയുടെ വരികള്‍ക്ക് നിഹാല്‍, പ്രകാശ് അലക്‌സ്, വിമല്‍ എന്നിവരാണ് സംഗീതമൊരുക്കുന്നത്. ഛായാഗ്രഹണം ഷാരോണ്‍ ശ്രീനിവാസ്. എഡിറ്റിംഗ് അമല്‍ മനോജ്. കലാസംവിധാനം അനീസ് നാടോടി. കോസ്റ്റ്യൂം ഡിസൈന്‍ സമീറാ സനീഷ്. മേക്കപ്പ് നരസിംഹ സ്വാമി. എക്‌സിക്യൂട്ടീവ് പ്രൊഡ്യൂസര്‍ വിനയ് ബാബു. പ്രൊഡക്ഷന്‍ മാനേജേര്‍സ് സെന്തില്‍ പൂജപ്പുര, നജീര്‍ നസീം. പ്രൊഡക്ഷന്‍ എക്‌സിക്യൂട്ടീവ് ഷിബു പന്തലക്കോട്. പ്രൊഡക്ഷന്‍ കണ്‍ട്രോളര്‍ ഷിബു ജി. സുശീലന്‍. പി.ആര്.ഒ. വാഴൂര്‍ ജോസ്. ഫോട്ടോ വിഷ്ണു എസ്. രാജന്‍.
Recent Comments