ഷെബി ചൗഘട്ട് സംവിധാനം ചെയ്യുന്ന ഗ്യാങ്‌സ് ഓഫ് സുകുമാരക്കുറുപ്പിന്റെ ചിത്രീകരണം തിരുവനന്തപുരത്ത് ആരംഭിച്ചു. പ്രജീവം മൂവീസിന്റെ ബാനറില്‍ പ്രജീവ് സത്യവ്രതനാണ് ചിത്രം നിര്‍മ്മിക്കുന്നത്. ആക്കുളം ടൂറിസ്റ്റ് വില്ലേജില്‍ ലായിരുന്നു ചിത്രീകരണം.
ഷൂട്ടിംഗിന് മുന്നോടിയായി നടന്ന പൂജാച്ചടങ്ങ് സംവിധായകന്‍ ഷാജി കൈലാസ് ഭദ്രദീപം തെളിയിച്ച് ഉദ്ഘാടനം ചെയ്തു. പ്രകാശിനി, പ്രജീവ് സത്യവ്രതന്‍, നിര്‍മ്മാതാവ് സന്തോഷ് ദാമോദരന്‍, സംവിധായകന്‍ ഷെബി ചൗഘട്ട്, ബിഗ് ബോസ് താരം രജിത് കുമാര്‍ എന്നിവര്‍ ചേര്‍ന്ന് ചടങ്ങ് പൂര്‍ത്തീകരിച്ചു.
പൂര്‍ണ്ണമായും ഒരു ത്രില്ലര്‍ ചിത്രമാണിത്. ഗുണ്ടാപ്രവര്‍ത്തനങ്ങള്‍ ആവസാനിപ്പിച്ച സുകുമാരക്കുറുപ്പ് ചെറുപ്പക്കാരായ മുജീബ്, പ്രേമന്‍, ഹരി, പോട്ടര്‍ എന്നിവരെയും ചേര്‍ത്ത് ഒരു കോഫി ഷോപ്പ് ആരംഭിക്കുന്നു. ഗ്യാങ്‌സ് ഓഫ് സുകുമാരക്കുറുപ്പ് എന്നാണിവര്‍ അറിയപ്പെടുന്നത്. ദുല്‍ഖര്‍ സല്‍മാന്‍ നായകനായി അഭിനയിച്ച കുറുപ്പ് എന്ന സിനിമയിലെ കഥാപാത്രത്തിനുണ്ടാകുന്ന ചില പ്രശ്‌നങ്ങള്‍ സുകുമാരക്കുറുപ്പിന്റെ ജീവിതത്തിലും ആക്‌സ്മികമായി സംഭവിക്കുന്നു. ഇതിനെത്തുടര്‍ന്ന് കുറുപ്പിന്റേയും ഗ്യാങ്ങിന്റേയും ജീവിതത്തില്‍ ചില പ്രശ്‌നങ്ങളും പ്രതിസന്ധികളും ഉണ്ടാകുന്നു. ഇത് പരിഹരിക്കാനുള്ള ശ്രമമാണ് ചിത്രത്തെ ഉദ്വേഗഭരതിമാക്കുന്നത്.
അബു സലിമാണ് സുകുമാരക്കുറുപ്പ് എന്ന ടൈറ്റില്‍ റോളിലെത്തുന്നത്. മുജീബായി റുഷിനും ഹരിയായി സൂര്യക്രിഷും പോട്ടര്‍ ആയി വൈഷ്ണവും അഭിനയിക്കുന്നു.’ സിനോജ് വര്‍ഗീസ്സാണ് പ്രേമനെ അവതരിപ്പിക്കുന്നത്. ടിനി ടോം, ജോണി ആന്റണി, ഇനിയ, സുജിത് ശങ്കര്‍, ശ്രീജിത്ത് രവി ദിനേശ് പണിക്കര്‍ തുടങ്ങിയവരും ചിത്രത്തിന്റെ ഭാഗമാകുന്നു.
Recent Comments