ഇന്ന് സുരേഷ് ഗോപിയുടെ ജന്മദിനമാണ്. അദ്ദേഹത്തിന് പിറന്നാള്‍ സമ്മാനമായി ഗരുഡന്റെ അണിയറപ്രവര്‍ത്തകര്‍ സമ്മാനിച്ചത് ചിത്രത്തിന്റെ ടീസറും. 19 സെക്കന്റ് ദൈര്‍ഘ്യമുള്ള ടീസറില്‍ സുരേഷ് ഗോപിയുടെ അഞ്ച് വ്യത്യസ്ത ഭാവങ്ങള്‍ നിറഞ്ഞ ഷോട്ടുകളാണ് ഉള്ളത്.
നവാഗതനായ അരുണ്‍ വര്‍മ്മ സംവിധാനം ചെയ്യുന്ന സിനിമയാണ് ഗരുഡന്‍. മാജിക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫനാണ് ചിത്രം നിര്‍മ്മിച്ചിരിക്കുന്നത്.
സുരേഷ് ഗോപിയും ബിജു മേനോനുമാണ് കേന്ദ്രകഥാപാത്രങ്ങളെ അവതരിപ്പിക്കുന്നത്. പതിനൊന്ന് വര്‍ഷത്തിന് ശേഷമാണ് സുരേഷ് ഗോപിയും ബിജു മേനോനും ഒന്നിക്കുന്നത്. കളിയാട്ടം, പത്രം, രണ്ടാംഭാവം, എഫ്ഐആര്‍, ക്രിസ്ത്യന്‍ ബ്രദേഴ്സ്, ട്വന്റി-ട്വന്റി തുടങ്ങിയ നിരവധി ഹിറ്റ് ചിത്രങ്ങളില്‍ ഇവര്‍ ഒരുമിച്ചു അഭിനയിച്ചു. 2010 ല്‍ പുറത്തിറങ്ങിയ രാമരാവണനായിരുന്നു ഇവര്‍ ഏറ്റവും ഒടുവിലായി അഭിനയിച്ച ചിത്രം.
ക്രൈം ത്രില്ലറാണ് ഗരുഡന്‍. ചിത്രത്തിന് തിരക്കഥ ഒരുക്കുന്നത് മിഥുന്‍ മാനുവല്‍ തോമസാണ്. അഞ്ചാം പാതിരായ്ക്ക് ശേഷം മിഥുന്‍ മാനുവല്‍ തോമസ് തിരക്കഥ എഴുതുന്ന ചിത്രം കൂടിയാണ് ഇത്. ജിനീഷ് എമ്മിന്റേതാണ് കഥ. ഛായാഗ്രഹണം അജയ് ഡേവിഡ് കാച്ചാപ്പിള്ളി.
ഗരുഡന്റ് ആദ്യ ഷെഡ്യൂള്‍ എറണാകുളത്തും തൃശൂരുമായി പൂര്‍ത്തിയായി. സുരേഷ് ഗോപിയുടെ സീനുകളാണ് ആദ്യ ഷെഡ്യൂളില്‍ ചിത്രീകരിച്ചത്. രണ്ടാം ഷെഡ്യൂളില്‍ ബിജു മേനോന്‍ ജോയിന്‍ ചെയ്യും.
Recent Comments