യൂ-ടേണ്‍, ലൂസിയ എന്നീ കന്നഡ ചിത്രങ്ങള്‍ ഒരുക്കിയ പവന്‍കുമാര്‍ ഫഹദ് ഫാസിലിനെ നായകനാക്കി സംവിധാനം ചെയ്യുന്ന സിനിമയാണ് ‘ധൂമം’. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ ഫഹദ് ഫാസില്‍ തന്റെ ഫേസ്ബുക്ക് പേജിലൂടെ പുറത്തുവിട്ടു.
‘എല്ലാ പുകചുരുളുകളിലും ഒരു രഹസ്യം മറഞ്ഞിരിപ്പുണ്ടാവും. മറഞ്ഞുപോവാന്‍ പാടില്ലാത്ത രഹസ്യങ്ങള്‍. ഈ സസ്പെന്‍സ് ത്രില്ലര്‍ ഡ്രാമയ്‌ക്കൊപ്പം ഹൃദയമിടിപ്പ് കൂട്ടുന്ന ഒരു സവാരിക്കായി ഒരുങ്ങിക്കോളൂ’ എന്നാണ് ഫസ്റ്റ് ലുക്ക് പോസ്റ്റര്‍ പുറത്തുവിട്ടുകൊണ്ട് ഫഹദ് ഫേസ്ബുക്കില്‍ കുറിച്ചത്.
അപര്‍ണ ബാലമുരളിയാണ് നായിക. ‘മഹേഷിന്റെ പ്രതികാരം’ എന്ന ചിത്രത്തിനു ശേഷം ഫഹദും, അപര്‍ണയും ഒന്നിച്ചെത്തുന്ന ചിത്രം കൂടിയാണ് ധൂമം’. വിനീതും റോഷന്‍ മാത്യുവും ശക്തമായ രണ്ട് കഥാപാത്രങ്ങളെ അവതരിപ്പിക്കുന്നു. അച്യുത് കുമാര്‍, ജോയ് മാത്യു, നന്ദു എന്നിവരാണ് മറ്റ് താരങ്ങള്‍.
കെജിഎഫ്, കാന്താര എന്നീ സൂപ്പര്‍ ഹിറ്റ് ചിത്രങ്ങള്‍ക്ക് ശേഷം വിജയ് കിരഗന്ദൂരിന്റെ ഉടമസ്ഥതയിലുള്ള ഹോംബാലെ ഫിലിംസ് നിര്‍മ്മിക്കുന്ന ചിത്രമാണ് ധൂമം. മലയാളത്തിന് പുറമെ, തമിഴ്, കന്നഡ, തെലുങ്ക് എന്നീ ഭാഷകളിലും ധൂമം റിലീസ് ചെയ്യും. മാജിക് ഫ്രെയിംസും പൃഥ്വിരാജ് പ്രൊഡക്ഷന്‍സും ചേര്‍ന്നാണ് വിതരണത്തിന് എത്തിക്കുന്നത്.
ഛായാഗ്രഹണം പ്രീത ജയരാമന്‍. സംഗീതം പൂര്‍ണചന്ദ്ര തേജസ്വി. ക്രിയേറ്റീവ് പ്രൊഡ്യൂസര്‍ കാര്‍ത്തിക് വിജയ് സുബ്രഹ്‌മണ്യം. സൗണ്ട് ഡിസൈന്‍ രംഗനാഥ് രവി, ആര്‍ട്ട് അനീസ് നാടോടി, കോസ്റ്റ്യൂം പൂര്‍ണിമ രാമസ്വാമി, പ്രൊഡക്ഷന്‍ കണ്‍ട്രോളര്‍ ഷിബു സുശീലന്‍, പിആര്‍ഒ മഞ്ജു ഗോപിനാഥ്.
Recent Comments