ഗോപിസുന്ദര്‍ മ്യൂസിക് കമ്പനി നിര്‍മ്മിക്കുന്ന ക്രിസ്മസ് കരോള്‍ ഗാനം റിലീസിന് തയ്യാറാവുന്നു. ഉണ്ണീശോ എന്നാണ് മ്യൂസിക് വീഡിയോയുടെ പേര്. ഇതാദ്യമായിട്ടാണ് ഗോപിസുന്ദര്‍ ഒരു കരോള്‍ ഗാനത്തിന് ഈണം പകരുകയും അത് നിര്‍മ്മിക്കുകയും ചെയ്യുന്നത്. ഹരിനാരായണനാണ് കരോള്‍ ഗാനം എഴുതിയിരിക്കുന്നത്. പാടിയിരിക്കുന്നത് മെറില്‍ ആന്‍മാത്യു ആണ്.
പുതുതലമുറയിലെ ശ്രദ്ധേയ ഗായികയാണ് മെറില്‍. ദോഹയിലെ ബിര്‍ള പബ്ലിക് സ്‌കൂളിലെ ആറാം ക്ലാസ് വിദ്യാര്‍ത്ഥിയാണ്. കണ്ണൂര്‍ ആലക്കോട്, അറക്കല്‍ മനോജ്-നിഷ വര്‍ഗ്ഗീസ് ദമ്പതികളുടെ മകളാണ്. പ്രശസ്ത സംഗീതാദ്ധ്യാപകരായ ശങ്കര്‍ദാസിന്റേയും അഭിലാഷിന്റേയും കീഴില്‍ ശാസ്ത്രീയസംഗീതവും വെസ്റ്റേണ്‍ മ്യൂസിക്കും അഭ്യസിക്കുന്നു. മെറില്‍ ആന്‍മാത്യു മുമ്പും നിരവധി ആല്‍ബങ്ങളിലും സ്റ്റേജ് ഷോകളിലും പാടിയിട്ടുണ്ട്.
യൂസഫ് ലെന്‍സ്മാന്‍ ആണ് ഈ വീഡിയോ ആല്‍ബത്തിന്റെ സംവിധായകന്‍. ബൈസി ഭാസിയും ഇവാനിയ നാഷും മുഖ്യവേഷത്തില്‍ എത്തുന്ന ഈ ആല്‍ബത്തിനുവേണ്ടി കോറിയോഗ്രഫി നിര്‍വ്വഹിച്ചിരിക്കുന്നത് ശ്രീജിത്ത് ഡാന്‍സ് സിറ്റി ആണ്. രഞ്ജിത്ത് ടച്ച് റിവറാണ് എഡിറ്റര്‍. പ്രോജക്ട് ഡിസൈനര്‍ ഷംസി തിരൂര്‍.
Recent Comments