സീതാ രാമത്തിന് ശേഷം ദുല്‍ഖര്‍ അഭിനയിക്കുന്ന പുതിയ തെലുങ്ക് ചിത്രത്തിന്റെ പ്രീപ്രൊഡക്ഷന്‍ പുരോഗമിക്കുന്നതിനിടെ സിനിമയുടെ പുതിയ അപ്‌ഡേറ്റ്‌സ് പുറത്ത് വിട്ടിരിക്കുകയാണ് അണിയറ പ്രവര്‍ത്തകര്‍. ചിത്രത്തിന് സംഗീതം ഒരുക്കുന്നത് ജി.വി. പ്രകാശാണ്. ജി.വി. പ്രകാശിന്റെ ജന്മദിനത്തോടനുബന്ധിച്ചാണ് (ജൂണ്‍ 13) ഈ വിവരം ഔദ്യോഗികമായി അറിയിച്ചിരിക്കുന്നതും. വാത്തി, സൂററൈ പോട്ര്, മദിരാശി പട്ടണം, ആടുകളം, തെറി, അസുരന്‍, രാജാറാണി തുടങ്ങി നിരവധി സൂപ്പര്‍ ഹിറ്റ് ചിത്രങ്ങള്‍ക്കുവേണ്ടി ഹിറ്റ് ഗാനങ്ങള്‍ ഒരുക്കിയ സംഗീത സംവിധായകനാണ് ജി.വി. പ്രകാശ്.
വാത്തിയുടെ വിജയത്തിനുശേഷം വെങ്കി അറ്റ്‌ലൂരി സംവിധാനം ചെയ്യുന്ന ചിത്രം കൂടിയാണിത്. പ്രൊഡക്ഷന്‍ നമ്പര്‍ 24 എന്നാണ് ചിത്രത്തിന് താല്‍ക്കാലികമായി നല്‍കിയിരിക്കുന്ന പേര്. ചിത്രീകരണം ഒക്ടോബറില്‍ ആരംഭിക്കും. സിത്താര എന്റര്‍ടൈന്‍മെന്റ്‌സും ഫോര്‍ച്യൂണ്‍ ഫോര്‍ സിനിമാസും ചേര്‍ന്നാണ് ചിത്രം നിര്‍മ്മിക്കുന്നത്. നാഗ വംശി, സായി സൗജന്യ എന്നിവരാണ് നിര്‍മ്മാതാക്കള്‍. കേരളത്തില്‍ വേഫെറര്‍ ഫിലിംസിനാണ് വിതരണാവകാശം. റിലീസ് അടുത്ത വര്‍ഷമാണ് പ്ലാന്‍ ചെയ്തിരിക്കുന്നത്. പിആര്‍ഒ പ്രതീഷ് ശേഖര്‍.
Recent Comments