ബോളിവുഡ് താര സുന്ദരിമാര്‍ തെന്നിന്ത്യന്‍ സിനിമ കീഴടക്കി കൊണ്ടിരിക്കുന്ന കാലമാണ്. തെന്നിന്ത്യന്‍ നടിമാര്‍ക്ക് ബോളിവുഡില്‍ ചേക്കേറാനാവുകയെന്നത് ബാലികേറാമലയാണ്. എങ്കിലും ഇതിനൊരു അപവാദമായിരുന്നു രേഖ, വൈജയന്തി മാല, ഹേമമാലിനി, ശ്രീദേവി, ജയപ്രദ എന്നിവര്‍. ഹിന്ദി സിനിമാ പ്രേമികളുടെ മാനസം കീഴടക്കി ബോളിവുഡിലെ താരറാണിമാരും സ്വപ്‌നറാണിമാരുമായി ദീര്‍ഘകാലം വിലസി. ഇപ്പോഴിതാ തെലുങ്കാനയില്‍ നിന്നും ഒരു സുന്ദരി കൂടി ബോളിവുഡ് കീഴടക്കാന്‍ എത്തിയിരിക്കുന്നു. പേര് അമ്രിന്‍ ഖുറേഷി. പ്രശസ്ത തെലുങ്കു സിനിമാ നിര്‍മ്മാതാവും സംവിധായകനുമായ സജിത്ത് ഖുറേഷിയുടെ മകളായ അമ്രിന്‍ ഖുറേഷി ഹിന്ദി സിനിമയിലെ പ്രമുഖനായ സംവിധായകന്‍ രാജ്കുമാര്‍ സന്തോഷിയുടെ ‘ബാഡ് ബോയ് ‘ എന്ന സിനിമയിലൂടെയാണ് ബോളിവുഡ് അരങ്ങേറ്റം നടത്തുന്നത്.
തെലുങ്കില്‍ വന്‍വിജയം നേടിയ ‘സിനിമാ ചൂപിസ്ത മാവ’ എന്ന സിനിമയുടെ ഹിന്ദി പുനരാവിഷ്‌ക്കാരമാണ് ഈ ചിത്രം . മിഥുന്‍ ചക്രവര്‍ത്തിയുടെ പുത്രന്‍ നമാഷ് ചക്രവര്‍ത്തിയാണ് അമ്രിന്റെ നായകന്‍. നമാഷിന്റേയും അരങ്ങേറ്റ ചിത്രം കൂടിയാണ് ‘ബാഡ് ബോയ് ‘. ഈ സിനിമയുടെ ചിത്രീകരണം ജനുവരിയില്‍ തുടങ്ങുമെന്ന ഔദ്യോദിക പ്രഖ്യാപനം വന്നതോടെ മറ്റൊരു ഹിന്ദി ചിത്രത്തിലും അമ്രിന്‍ ഖുറേഷി നായികയായി കരാര്‍ ചെയ്യപ്പെട്ടു കഴിഞ്ഞു. അല്ലു അര്‍ജ്ജുന്റെ ബ്ലോക്ക് ബസ്റ്റര്‍ സിനിമ ‘ജൂലൈ ‘യുടെ ഹിന്ദി പതിപ്പാണ് അമ്രിന്‍ നായികയാവുന്ന രണ്ടാമത്തെ ചിത്രം. അന്തോണി ഡിസൂസയാണ് സംവിധായകന്‍. വിദ്യാഭ്യാസ കാലത്തു തന്നെ സിനിമയാണ് തന്റെ പ്രൊഫഷനെന്ന് അമ്രിന്‍ ഖുറേഷി മനസ്സില്‍ തീര്‍ച്ചപ്പെടുത്തിയിരുന്നു. പഠനം കഴിഞ്ഞയുടന്‍ അതിനായുള്ള ഹോം വര്‍ക്കുകളും തുടങ്ങി അമ്രിന്‍. അതിനെക്കുറിച്ച് അമ്രിന്‍ വിശദീകരിക്കുന്നു.
‘ഹൈദരാബാദില്‍ പഠനം പൂര്‍ത്തിയാക്കിയ ഉടന്‍ തന്നെ ഒരു നടിയാവണം എന്ന് തീരുമാനിച്ചു. അനുപംഖേറിന്റെ ഇന്‍സ്റ്റിട്യൂട്ടില്‍ ചേര്‍ന്ന് അഭിനയം പഠിച്ചു. അതിനു ശേഷം ഏതാനും അഭിനയ കളരികളിലും പങ്കെടുത്തതോടെ എന്റെ ആത്മവിശ്വാസം വര്‍ദ്ധിച്ചു. ഗ്ലാമറിനൊപ്പം അഭിനയവും എനിക്ക് നന്നായി വഴങ്ങും എന്ന് ബോധ്യപ്പെട്ട ശേഷമാണ് അവസരങ്ങള്‍ക്കുള്ള അന്വേഷണം തുടങ്ങിയത്. രാജ് കുമാര്‍ സന്തോഷി സര്‍ പലവട്ടം ഓഡിഷന്‍ നടത്തിയ ശേഷമാണ് ‘ബാഡ് ബോയി’ യിലേക്ക് നായികയായി എന്നെ തിരഞ്ഞെടുത്തത്. അദ്ദേഹത്തിന്റെ സിനിമയിലൂടെ ബോളിവുഡില്‍ അരങ്ങേറ്റം നടത്താന്‍ അവസരം ലഭിച്ചത് മഹാഭാഗ്യം! തുടര്‍ന്ന് അന്തോണി ഡി സൂസയുടെ മറ്റൊരു ചിത്രത്തിലേക്കും ക്ഷണം കിട്ടി. സിനിമ എന്റെ പാഷനാണ്. ഭാഷാഭേദദമന്യേ എനിക്ക് തമിഴ് -തെലുങ്കു സിനിമകളില്‍ മാത്രമല്ല മലയാളത്തിലും അഭിനയിക്കണമെന്ന് അതിയായ ആഗ്രഹമുണ്ട് അതും സഫലമാവാന്‍ കാത്തിരിക്കയാണ് ഞാന്‍.’
Recent Comments