ഏറെ അപകടകാരിയായ ജെല്ലിക്കെട്ട് കാളയുമായി മല്‍പ്പിടുത്തം നടത്തുന്ന ചിത്രങ്ങള്‍ പുറത്തുവിട്ട് യുവതാരം അപ്പാനി ശരത്ത്. പ്രശസ്ത സംവിധായകന്‍ വിനോദ് ഗുരുവായൂര്‍ ആദ്യമായി സംവിധാനം ചെയ്യുന്ന തമിഴ് ചിത്രത്തിന്റെ ഭാഗമായുള്ള പരിശീലന ചിത്രങ്ങളാണ് നടന്‍ പുറത്തുവിട്ടത്.
ജെല്ലിക്കെട്ട് പ്രമേയമായുള്ള ചിത്രത്തിന്റെ പരിശീലനം പഴനിയില്‍ നടക്കുകയാണ്. ജെല്ലിക്കെട്ട് കാളയോടൊപ്പം കഴിയുന്ന ഒരു അപരിഷ്‌കൃത യുവാവായ ‘മാട’ എന്ന കഥാപാത്രമാണ് ശരത്ത് ചിത്രത്തില്‍ അവതരിപ്പിക്കുന്നത്.
ജെല്ലിക്കെട്ട് കാളയുമായിട്ടുള്ള പരിശീലനം തന്റെ അഭിനയജീവിതത്തിലെ വലിയ വെല്ലുവിളിയാണെന്ന് അപ്പാനി ശരത്ത് പറഞ്ഞു. ‘വന്യമൃഗങ്ങളെപ്പോലും നമുക്ക് പരിശീലിപ്പിച്ചെടുക്കാം. പക്ഷേ ജെല്ലിക്കെട്ട് കാളകള്‍ പേടിപ്പിക്കുന്നവയാണ്. അടുത്തേക്ക് ചെല്ലാന്‍ പോലും പേടിയാണ്. ജീവന്‍ പണയംവെച്ചാണ് ഞാന്‍ കാളകളുടെ അടുത്തേക്ക് ചെല്ലുന്നത്. പരിശീലകന്‍ ഉണ്ടെങ്കിലും ഞാന്‍ തന്നെയാണ് എല്ലാം ചെയ്യുന്നത്. ജെല്ലിക്കെട്ട് കാളകളുടെ ഭയാനകമായ രൂപമാണ് എല്ലാവരെയും ഭയപ്പെടുത്തുന്നത്. എനിക്ക് വലിയ വെല്ലുവിളിയാണ്. പക്ഷേ ഞാന്‍ ചെയ്യും അത്രയ്ക്കും ആത്മവിശ്വാസമുണ്ട്.’ ശരത്ത് പറഞ്ഞു.
മലയാളത്തിലും തമിഴിലും ഒട്ടേറെ നല്ല കഥാപാത്രങ്ങള്‍ ചെയ്ത ശരത്ത് തമിഴിലും സ്വീകാര്യതയുള്ള നടനാണ്. ഇനിയും പേരിടാത്ത ഈ തമിഴ് ചിത്രത്തിന്റെ ചിത്രീകരണം മെയ് ആദ്യവാരം തുടങ്ങും. പഴനിയിലെ റിച്ച് മള്‍ട്ടി മീഡിയ ഡയറക്ടര്‍ ഡോ. ജയറാമാണ് ചിത്രത്തിന്റെ കഥയും തിരക്കഥയും സംഭാഷണവും എഴുതുന്നത്. ചിത്രം നിര്‍മ്മിക്കുന്നതും ജയറാം തന്നെയാണ്. വാര്‍ത്താപ്രചരണം പി ആര്‍ സുമേരന്‍.
Recent Comments