സിനിമ പ്രേമികള്‍ ഏറെ കാത്തിരുന്ന കമല്‍ഹാസന്‍ ചിത്രം ഇന്ത്യന്‍ 2 ഇന്ന് പുനരാരംഭിക്കും. ചിത്രത്തിന് വേണ്ടിയുള്ള കമലിന്റ ഒരു മാസ്സ് ലുക്ക് പോസ്റ്റര്‍ പുറത്ത് വിട്ടിരിക്കുകയാണ് അണിയറ പ്രവര്‍ത്തകര്‍.
2019 ലാണ് ഇന്ത്യന്‍ 2 ന്റെ ചിത്രീകരണം ആരംഭിച്ചത്. ചിത്രത്തിന് ഒട്ടേറെ പ്രതിസന്ധികള്‍ ചിത്രീകരണസമയത്ത് നേരിടേണ്ടിവന്നിരുന്നു. അതില്‍ ഒന്നാണ് ചിത്രീകരണസമയത്ത് ഉണ്ടായ ക്രെയിന്‍ ആക്‌സിഡന്റ്. ആ അപകടത്തില്‍ സിനിമാ പ്രവര്‍ത്തകരായ രണ്ട് പേരാണ് മരണമടഞ്ഞത്. അതേത്തുടര്‍ന്ന് ഷൂട്ടിംഗ് നിര്‍ത്തിവയ്ക്കുകയായിരുന്നു. പിന്നീട് കോവിഡിന്റെ വരവോടെ ചിത്രത്തിന്റെ ഷൂട്ടിംഗ് പൂര്‍ണ്ണമായും നിലച്ചു. ഏകദേശം രണ്ട് വര്‍ഷങ്ങള്‍ക്കിപ്പുറമാണ് ചിത്രത്തിന്റെ ഷൂട്ടിംഗ് വീണ്ടും ആരംഭിച്ചിരിക്കുന്നത്.
സംവിധായകന്‍ ശങ്കര്‍ ഒരുക്കുന്ന ഈ ചിത്രത്തില്‍ കമല്‍ അടുത്ത മാസം ജോയിന്‍ ചെയ്യും. സിനിമയുടെ മുന്നൊരുക്കങ്ങള്‍ക്കായി കമല്‍ ഇപ്പോള്‍ യൂ.എസ്സിലാണുള്ളത്. നിലവില്‍ താരങ്ങളായ കാജല്‍ അഗര്‍വാള്‍, ബോബി സിംഹ എന്നിവര്‍ അഭിനയിക്കുന്ന രംഗങ്ങളാകും ഷൂട്ട് ചെയ്യുക. ഉദയനിധി സ്റ്റാലിന്റെ റെഡ് ജയന്റ് മൂവീസിനൊപ്പം ലൈക്ക പ്രൊഡക്ഷന്‍സും ചേര്‍ന്നാണ് ഈ ബിഗ്ബഡ്ജറ്റ് ചിത്രം നിര്‍മ്മിക്കുന്നത്.ചിത്രത്തില്‍ രാകുല്‍ പ്രീത്, സിദ്ധാര്‍ഥ്, പ്രിയ ഭവാനി ശങ്കര്‍ എന്നിവരും മറ്റു പ്രധാന വേഷങ്ങളില്‍ അഭിനയിക്കുന്നു. അനിരുദ്ധാണ് സംഗീതം ഒരുക്കുന്നത്.
ഏതാണ്ട് മുപ്പത് വര്‍ഷങ്ങള്‍ക്കുശേഷം കമല്‍ഹാസന്റെയും രജനികാന്തിന്റെയും ചിത്രങ്ങള്‍ ഒരേദിവസം തീയേറ്ററില്‍ റിലീസ് ചെയ്യുമെന്നാണ് സൂചന. 2023 മകരപൊങ്കള്‍ പ്രമാണിച്ച് ജനുവരിയിലായിരിക്കും രണ്ട് ചിത്രങ്ങളുടേയും റിലീസ്. രജനികാന്തിനെ നായകനാക്കി നെല്‍സണ്‍ സംവിധാനം ചെയ്യുന്ന ജയിലറും, ശങ്കറിന്റെ ഇന്ത്യന്‍ 2 ഉം ഒരുമിച്ചെത്തുമെന്നുള്ള ആവേശത്തിലാണ് രണ്ട് താരങ്ങളുടെയും ആരാധകര്‍. സണ്‍ പിക്‌ച്ചേഴ്‌സ്് തന്നെയാണ് ജയിലറും നിര്‍മ്മിക്കുന്നത്. കൂടാതെ ഇന്ത്യന്‍ 2 വിന് സംഗീതം ഒരുക്കുന്ന അനിരുദ്ധ് രവിചന്ദ്രറാണ് ജയിലറിന്റെയും സംഗീതം നിര്‍വ്വഹിക്കുന്നത്.
Recent Comments