രഞ്ജിന് രാജ് എന്ന സംഗീത സംവിധായകനെ സംഗീതാസ്വാദകര്‍ തിരിച്ചറിയാന്‍ തുടങ്ങിയത് ‘ജോസഫ്’ എന്ന സിനിമ മുതല്‍ക്കാണ്. ‘ജോസഫില്‍’ തുടങ്ങി ‘മാളികപ്പുറം’ വരെയുള്ള സിനിമകളിലുടെ ഒരു പിടി ജനപ്രീതി ആര്‍ജിച്ച ഗാനങ്ങള്‍ ചെയ്യാന്‍ രഞ്ജിന് സാധിച്ചിട്ടുണ്ട്. രഞ്ജിന് രാജ് ഈണം പകര്‍ന്ന ഏറ്റവും പുതിയ ഗാനമാണ് ‘കുഞ്ഞമ്മിണിസ് ഹോസ്പിറ്റല്‍’ എന്ന ചിത്രത്തിലെ ‘ആകാശത്തല്ല’ എന്ന് തുടങ്ങുന്ന ഗാനം.
യൂട്യൂബില്‍ ഇപ്പോള്‍ വൈറലാണ് ഈ ഗാനം. പാട്ട് ശ്രദ്ധ നേടിയതിന് പിന്നില്‍ ചില കാരണങ്ങളുണ്ട്. ഇത് പാടിയിരിക്കുന്നത് പ്രശസ്ത സംഗീത സംവിധായകന്‍ വിദ്യാധരന്‍ മാസ്റ്ററും നടന്‍ ഇന്ദ്രജിത്ത് സുകുമാരനും യുവ ഗായിക ദിവ്യ എസ്. മേനോനും ചേര്‍ന്നാണ്. ഈ ഗാനരംഗത്തില്‍ പാടി അഭിനയിക്കാനുള്ള അവസരവും ഇന്ദ്രജിത്തിന് ലഭിച്ചു.
സന്തോഷകരമായ ഒരു മരണാന്തര ജീവിതത്തെക്കുറിച്ചുള്ള സങ്കല്‍പ്പമാണ് ഈ ഗാനത്തിന് പിന്നില്‍. അതിലെ വരികള്‍ എഴുതിയിരിക്കുന്നത് സന്തോഷ് വര്‍മ്മയാണ്. ഈ ഗാനരംഗത്തിന് നൃത്തച്ചുവടുകള്‍ ഒരുക്കിയിരിക്കുന്നത് ശ്രീജിത്ത് ഡാന്‍സിറ്റിയാണ്. നേരത്തെ ധ്യാന്‍ ശ്രീനിവാസനും കുഞ്ഞമ്മിണീസ് ഹോസ്പിറ്റലിനുവേണ്ടി ഒരു ഗാനം ആലപിച്ചിരുന്നു.
പുതുമയാര്‍ന്ന കാസ്റ്റിംഗാണ് ചിത്രത്തിന്റെ മറ്റൊരു ഹൈലൈറ്റ്. ഇന്ദ്രജിത്ത് സുകുമാരന്‍, നൈല ഉഷ, ബാബുരാജ്, സരയൂ മോഹന്‍, മല്ലിക സുകുമാരന്‍, ശാരി, ഹരിശ്രീ അശോകന്‍, ബിജു സോപാനം, ശരത് ദാസ്, അല്‍താഫ് മനാഫ്, ബാലതാരമായ ആഷ്വി എന്നിവരോടൊപ്പം പ്രകാശ് രാജും ഒരു പ്രധാന വേഷത്തില്‍ എത്തുന്നു.
സനല്‍ വി. ദേവന്‍ ആദ്യമായി സംവിധാനം ചെയ്യുന്ന ചിത്രം കൂടിയാണ് കുഞ്ഞമ്മിണീസ് ഹോസ്പിറ്റല്‍. വൗ സിനിമാസിന്റെ ബാനറില്‍ സന്തോഷ് ത്രിവിക്രമനാണ് ചിത്രം നിര്‍മ്മിക്കുന്നത്. ‘പ്രിയന്‍ ഓട്ടത്തിലാണ്’, ‘ചതുര്‍മുഖം’, ‘പുണ്യാളന്‍ അഗര്‍ബത്തീസ്’ എന്നി ചിത്രങ്ങള്‍ക്കുശേഷം അഭയകുമാറും അനില്‍ കുര്യനും ചേര്‍ന്ന് കഥയും തിരക്കഥയും സംഭാഷണവും എഴുതുന്നു. ജൂലൈയില്‍ ചിത്രം പ്രദര്‍ശനത്തിനെത്തും.
Recent Comments