ശനിയാഴ്ച അര്‍ദ്ധരാത്രി മുതല്‍ സോഷ്യല്‍ മീഡിയയിലെ ചര്‍ച്ചാവിഷയം സണ്ണി വെയ്‌നും ലുക്ക്മാനും തമ്മിലുള്ള അടിയായിരുന്നു. സണ്ണി വെയ്‌നും ലുക്ക്മാനും തമ്മില്‍ പൊരിഞ്ഞ അടി എന്ന അടിക്കുറിപ്പോടെ ഒരു വീഡിയോ പ്രത്യക്ഷപ്പെട്ടതോടെയാണ് ചര്‍ച്ചകള്‍ ആരംഭിക്കുന്നത്.
വീഡിയോയില്‍ ഇരുവരും തമ്മില്‍ ബഹളം വയ്ക്കുന്നതും തര്‍ക്കിക്കുന്നതും അവ്യക്തമായി കാണാം. റൂമില്‍ ഒപ്പമുള്ളവര്‍ ഇവരെ പിടിച്ചു മാറ്റുന്നതും. ലുക്കു വേണ്ട, വേണ്ട എന്ന് വീഡിയോയില്‍ പറയുന്നുണ്ട്. വാടാ എന്ന് സണ്ണി വെയ്‌നും. പ്രശ്‌നം ഉണ്ടാക്കരുത് എന്ന് പറഞ്ഞാണ് ആളുകള്‍ ഇരുവരെയും പിടിച്ചു മാറ്റുന്നത്.
എന്നാല്‍ ഇത് സണ്ണിയും ലുക്ക്മാനും ഒന്നിക്കുന്ന ‘ടര്‍ക്കിഷ് തര്‍ക്കം’ എന്ന സിനിമയുടെ പ്രമോഷന്റെ ഭാഗമായിട്ട് പുറത്തിറങ്ങിയ വീഡിയോയായിരുന്നു. ചിത്രത്തിന്റെ ടൈറ്റില്‍പോസ്റ്റര്‍ ഇന്നലെ പുറത്തിറങ്ങി. ഇരുവരെയും കൂടാതെ അറുപത്തിമൂന്നോളം നടീനടന്മാരും സിനിമയില്‍ അണിനിരക്കുന്നു. ബിഗ് പിക്‌ചേഴ്‌സിന്റെ ബാനറില്‍ നവാസ് സുലൈമാനാണ് ടര്‍ക്കിഷ് തര്‍ക്കം തിരക്കഥയെഴുതി സംവിധാനം ചെയ്യുന്നത്.
ഇത്തരത്തിലൊരു പ്രൊമോഷന്‍ വീഡിയോ പുറത്തിറക്കാനുണ്ടായ കാരണം പങ്കുവച്ച് സണ്ണി വെയ്‌നും ലുക്ക്മാനും മറ്റൊരു വീഡിയോയുമായി എത്തി. വീഡിയോയില്‍ ഇരുവരും പരസ്പരം കൈ കൊടുത്ത് ആലിംഗനം ചെയ്യുന്നതിനോടൊപ്പം സിനിമയെയും പരിചയപ്പെടുത്തുന്നുണ്ട്. പടത്തിന്റെ ഇതിവൃത്തവുമായി അടുത്ത് നില്‍ക്കുന്നത് കൊണ്ടാണ് ഇത്തരമൊരു പ്രമോഷനല്‍ വീഡിയോ ചെയ്തതെന്നും അത് ആരെയെങ്കിലും വേദനിപ്പിച്ചിട്ടുണ്ടെങ്കില്‍ ക്ഷമ ചോദിക്കുന്നു എന്നും അവര്‍ പറയുന്നു.
Recent Comments