ഷിനി ഗാമി ഒരു ജാപ്പനീസ് വാക്കാണ്. ഷിനി ഗാമി എന്നാല്‍ കാലന്‍ എന്നാണര്‍ത്ഥം. ജപ്പാനില്‍ നിന്നും ഷിനിഗാമി കോഴ്‌സ് പൂര്‍ത്തിയാക്കി ഡോക്ടറേറ്റ് നേടിയ ആളാണ് ഈ ചിത്രത്തിലെ ഷിനിഗാമി. വേണമെങ്കില്‍ ഡോ. ഷിനി ഗാമി എന്നും പറയാം. ഈ ഷിനിഗാമി ഇപ്പോഴെത്തിയിരിക്കുന്നത് ഒരു ആത്മാവിനെത്തേടിയാണ്. കൈയില്‍ ഒരു ജോഡി ചെരുപ്പുമായിട്ടാണ് ഷിനി ഗാമിയുടെ നടപ്പ്. ഈ ചെരുപ്പു ധരിക്കുന്നതോടെ അത്മാവ് കൂടെപ്പോരണമെന്ന താണ് ഇവരുടെ വിശ്വാസം. കുട്ടന്‍ എന്നയാളിന്റെ ആത്മാവിലേക്കാണ് ഷിനിഗാമിയുടെ കടന്നുവരവ്. ഇവിടെ കുട്ടന്റെ ആത്മാവിനെ ചെരുപ്പു ധരിപ്പിക്കാനുള്ള ഷിന്‍ഗാമിയുടെ ശ്രമം നടക്കുന്നില്ല. തന്റെ മരണകാരണമറിയാതെ താന്‍ ചെരിപ്പിടില്ലായെന്നതായിരുന്നു അത്മാവിന്റെ വാശി. അദ്ദേഹത്തിന്റെ വാശിക്കുമുന്നില്‍ ഷിനിഗാമി വഴങ്ങി. പിന്നീട് ഇരുവരും ചേര്‍ന്ന് കുട്ടന്റെ മരണകാരണകാരണമന്വേഷിച്ചിറങ്ങുകയായി.
വ്യത്യസ്ത പ്രമേയങ്ങള്‍ ചലച്ചിത്രമാക്കിയിട്ടുള്ള റഷീദ് പാറക്കലിന്റെ പുതിയ ചിത്രത്തിന്റെ കഥാപരിസരവും വേറിട്ടതാകുന്നു. കുട്ടന്റെ ഷിനിഗാമി എന്നാണ് ചിത്രത്തിന്റെ പേര്. ഷിനിഗാമിയെ അവതരിപ്പിക്കുന്നത് ഇന്ദ്രന്‍സാണ്. ആത്മാവായി ജാഫര്‍ ഇടുക്കിയും അഭിനയിക്കുന്നു.
‘ഇന്ദ്രന്‍സിന്റെയും ജാഫര്‍ ഇടുക്കിയുടെയും അഭിനയ ജീവിത്തിലെ അവിസ്മരണീയ കഥാപാത്രങ്ങളായിരിക്കും ഈ ചിത്രത്തിലേത്. ഇതിലെ കാലനും ആത്മാവും സാധാരണക്കാരനെപ്പോലെയാണ് പ്രത്യക്ഷപ്പെടുന്നത്. ഇവരുടെ വേഷവിധാനങ്ങളില്‍ മറ്റ് ഗിമിക്‌സുകളൊന്നുമില്ല.’ സംവിധായകന്‍ റഷീദ് പാറക്കല്‍ പറഞ്ഞു.
ചിത്രത്തിന്റെ ഷൂട്ടിംഗ് ഇപ്പോള്‍ ഒറ്റപ്പാലത്ത് പുരോഗമിക്കുകയാണ്. അനീഷ്. ജി. മേനോന്‍, ശ്രീജിത്ത് രവി, സുനില്‍ സുഖദ, അഷറഫ് പിലായ്ക്കല്‍, ഉണ്ണിരാജാ, മുന്‍ഷി രഞ്ജിത്ത്, പ്രിയങ്ക, അഖില സന എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. സംവിധായകന്‍ തന്നെയാണ് ഇതിലെ ഗാനങ്ങളും രചിച്ചിരിക്കുന്നത്. സംഗീതം അര്‍ജുന്‍ വി. അക്ഷയ, ഗായകര്‍ ജാഫര്‍ ഇടുക്കി, അഭിജിത്ത്, ഛായാഗ്രഹണം ഷിനാബ് ഓങ്ങല്ലൂര്‍, എഡിറ്റിംഗ് സിയാന്‍ ശ്രീകാന്ത്, കലാസംവിധാനം എം. കോയാസ് എം., മേക്കപ്പ് ഷിജിതാനൂര്‍, കോസ്റ്റ്യൂം ഡിസൈന്‍ ഫെമിന ജബ്ബാര്‍, ചീഫ് അസ്സോസ്സിയേറ്റ് ഡയറക്ടര്‍ ജയേന്ദ്ര ശര്‍മ്മ, അസ്സോസ്സിയേറ്റ് ഡയറക്ടേര്‍സ് രഞ്ജിത്ത് രാമനാട്ടുകര, ശ്രീജിത്ത് ബാലന്‍, സഹ സംവിധാനം രാഗേന്ദ്, ബിനു ഹുസൈന്‍, നിര്‍മ്മാണ നിര്‍വ്വഹണം പി.സി. മുഹമ്മദ്, പ്രൊജക്റ്റ് ഡിസൈനര്‍ രജീഷ് പത്താംകുളം, പി.ആര്.ഒ വാഴൂര്‍ ജോസ്, ഫോട്ടോ ഷംനാദ്.
മഞ്ചാടി ക്രിയേഷന്‍സിന്റെ ബാനറില്‍ അഷറഫ് പിലായ്ക്കലാണ് ഈ ചിത്രം നിര്‍മ്മിക്കുന്നത്.
Recent Comments