വേല്‍ ഫിലിം ഇന്റര്‍നാഷണല്‍ നിര്‍മ്മിക്കുന്ന 25-ാമത്തെ ചിത്രമാണ് ജീനി. അര്‍ജുനന്‍ ജൂനിയര്‍ ആണ് സംവിധായകന്‍. മിഷ്‌കിന്റെ കീഴില്‍ സംവിധാനസഹായിയായി പ്രവര്‍ത്തിച്ചു വരികയായിരുന്നു അര്‍ജുനന്‍. അര്‍ജുനന്റെ ആദ്യ സംവിധാന സംരംഭമാണിത്.
ഇന്ന് രാവിലെ ചെന്നൈയില്‍വച്ചായിരുന്നു ചിത്രത്തിന്റെ പൂജ. ജയം രവിയാണ് നായകന്‍. കല്യാണി പ്രിയദര്‍ശന്‍, കൃതി ഷെട്ടി, വമിക്കാ ഗബ്ബി, ദേവയാനി എന്നിവരാണ് മറ്റു താരങ്ങള്‍. ഇവര്‍ പൂജാച്ചടങ്ങിലും പങ്കുകൊണ്ടിരുന്നു. ജയം രവിയും കല്യാണി പ്രിയദര്‍ശനും ആദ്യമായിട്ടാണ് ഒന്നിക്കുന്നത്. ജയംരവിയുടെ മുപ്പത്തി രണ്ടാമത് ചിത്രമാണ് ജീനി.
ഡോ. ഇഷാരി കെ. ഗണേഷാണ് നിര്‍മ്മാതാവ്. ഇഷാരിയുടെ ഉടമസ്ഥതയിലുള്ളതാണ് വേല്‍ ഫിലിം ഇന്റര്‍നാഷണല്‍. ചിമ്പു കേന്ദ്ര കഥാപാത്രത്തെ അവതരിപ്പിച്ച വെന്ത് തുനിന്തത് കാട് ഈ ബാനറില്‍ നിര്‍മ്മിച്ച ചിത്രമാണ്.
ജീനിക്കുവേണ്ടി സംഗീതം ഒരുക്കുന്നത് എ.ആര്. റഹ്‌മാനാണ്. ജയംരവി ടൈറ്റില്‍ ക്യാരക്ടറിനെ അവതരിപ്പിച്ച പൊന്നിയിന്‍ സെല്‍വന് വേണ്ടി സംഗീതം ചെയ്തതും എ.ആര്. റഹ്‌മാനായിരുന്നു. മഹേഷ് മുത്തുസ്വാമിയാണ് ഛായാഗ്രാഹകന്‍. ഹോളിവുഡിലെ പ്രശസ്ത സ്റ്റണ്ട് കോറിയോഗ്രാഫര്‍ യാനിക് ബെന്നാണ് ജീനിക്കുവേണ്ടി സംഘട്ടനം ഒരുക്കുന്നത്. എഡിറ്റര്‍ പ്രദീപ് ഇ. രാഘവ്.
പൊന്നിയില്‍ സെല്‍വത്തിനുശേഷം ജയംരവിയുടെ വന്‍ ബജറ്റില്‍ ഒരുക്കുന്ന ചിത്രംകൂടിയാണ് ജീനി. തമിഴിന് പുറമെ തെലുങ്ക്, മലയാളം, കന്നഡ എന്നീ ഭാഷകളിലും ചിത്രം റിലീസ് ചെയ്യും.
Recent Comments