മണിരത്‌നം ചിത്രം പൊന്നിയിന്‍ സെല്‍വത്തിനുശേഷം ജയം രവി നായകനാവുന്ന ചിത്രമാണ് ‘അഖിലന്‍’. നീണ്ട കാത്തിരിപ്പിനു ശേഷം ചിത്രത്തിന്റെ റിലീസ് തീയതി ഔദ്യോഗികമായി പ്രഖ്യാപിച്ചിരിക്കയാണ് അണിയറക്കാര്‍. മാര്‍ച്ച് 10 ന് ചിത്രം ലോകമെമ്പാടും റിലീസ് ചെയ്യുക. അതിന് മുന്നോടിയായി കഴിഞ്ഞ ദിവസം ചിത്രത്തിന്റെ ട്രെയിലര്‍ അണിയറക്കാര്‍ പുറത്തുവിട്ടിരുന്നു. ട്രെയിലറിന് മികച്ച സ്വീകരണമാണ് ലഭിച്ചു കൊണ്ടിരിക്കുന്നത്. ട്രെയിലര്‍ പുറത്തിറങ്ങി ഒരു ദിവസം പിന്നിടുമ്പോള്‍ അമ്പത് ലക്ഷത്തില്‍പരം കാണികളെ നേടി തരംഗമായിരിക്കയാണ്.
എന്‍. കല്യാണ കൃഷ്ണനാണ് രചനയും സവിധാനവും നിര്‍വ്വഹിച്ചിരിക്കുന്നത്. ഇത് രണ്ടാം തവണയാണ് ഇരുവരും ഒന്നിക്കുന്നത്. ‘ഭൂലോക’മാണ് ആദ്യചിത്രം. ‘അഖിലന്‍’ ജയം രവിയുടെ മറ്റൊരു ജനപ്രിയ സിനിമയായിരിക്കും എന്നാണ് അണിയറ ശില്പികളും ആരാധകരും കരുതുന്നത്.
ചിത്രത്തില്‍ അഖിലന്‍ എന്ന ഗുണ്ടയുടെ വേഷത്തിലാണ് ജയം രവി എത്തുന്നത്. കപ്പലുകളുടെയും തുറമുഖങ്ങളുടെയും പശ്ചാത്തലത്തിലാണ് ചിത്രം ഒരുക്കിയിരിക്കുന്നതെന്ന് മേക്കിംഗ് വീഡിയോയില്‍ നിന്ന് വ്യക്തമാണ്. ആദ്യന്തം കാണികളെ ആകാംഷയുടെ അഗ്രത്തില്‍ ശ്രദ്ധ കേന്ദ്രീകരിപ്പിക്കുന്ന ആക്ഷന്‍ എന്റര്‍ടെയിനറായിരിക്കും സിനിമയെന്ന് പ്രതീക്ഷിക്കാം. പ്രിയാഭവാനി ശങ്കറും താന്യ രവിചന്ദ്രനുമാണ് ചിത്രത്തിലെ നായികമാര്‍. സാം സി.എസ് സംഗീതവും, വിവേക് ആനന്ദ് ഛായാഗ്രഹണവും നിര്‍വഹിക്കുന്നു. മുരളി സില്‍വര്‍ സ്‌ക്രീന്‍ പിക്‌ചേഴ്‌സാണ് ചിത്രം കേരളത്തില്‍ റിലീസിനെത്തിക്കുന്നത്. പി.ആര്.ഒ. സി.കെ. അജയ് കുമാര്‍.
Recent Comments