കാവാല, ഹുക്കും എന്നീ സൂപ്പര്‍ ഹിറ്റ് പാട്ടുകള്‍ക്ക് ശേഷം ജയിലറിലെ മൂന്നാം ഗാനവും എത്തി. യൂട്യൂബില്‍ റിലീസ് ചെയ്ത് ഒരു മണിക്കൂറിനുള്ളില്‍ അഞ്ച ലക്ഷത്തിലധികം ആളുകളാണ് പാട്ട് കേട്ടത്. ഹിറ്റുകളുടെ തുടര്‍ച്ച എന്നാണ് ആസ്വാദകര്‍ ജൂജൂബി എന്ന ഗാനത്തെ വിശേഷിപ്പിച്ചിരിക്കുന്നത്. നെല്‍സണ്‍ സംവിധാനം ചെയ്ത് സൂപ്പര്‍സ്റ്റാര്‍ രജനികാന്ത് നായകനായി എത്തുന്ന ചിത്രത്തിലെ ഈ ഗാനം ആലപിച്ചിരിക്കുന്നതും ശ്രീലങ്കന്‍ വംശജയും പ്രമുഖ വൈറല്‍ ഗായികയുമായ ‘ദീ’ എന്നു വിളിപ്പേരുള്ള ദീക്ഷിത വെങ്കിടേശനാണ്.
ചിത്രത്തിലെ ആദ്യ ഗാനം ‘കാവാല’ ഹിറ്റായിരുന്നു. ഇന്‍സ്റ്റഗ്രാം റീല്‍സില്‍ അടക്കം പാട്ട് വൈറലാണ്. സ്‌റ്റൈല്‍ മന്നന്‍ രജനികാന്തിന്റെ മാസ് എന്‍ട്രിയോടെയുള്ള ‘ഹുക്കും’ എന്ന ഗാനവും ആസ്വാദകര്‍ക്ക് മികച്ച അനുഭവമാണ് സമ്മാനിച്ചത്. ‘കാവാല’ എന്ന ഗാനം 73 ദശലക്ഷം ആളുകളും ‘ഹുക്കും’ എന്ന പാട്ട് 14 ദശലക്ഷം പേരും ഇതുവരെ യൂട്യൂബില്‍ പ്ലേ ചെയ്തിട്ടുണ്ട്. മൂന്ന് പാട്ടുകളുടെയും സംഗീതം ഒരുക്കിയിരിക്കുന്നത് അനിരുദ്ധ് തന്നെയാണ്.
സണ്‍ പിക്‌ചേഴ്‌സിന്റെ ബാനറില്‍ കലാനിധി മാരന്‍ നിര്‍മിക്കുന്ന ജയിലര്‍ ഓഗസ്റ്റ് 10 നാണ് തീയേറ്ററുകളില്‍ എത്തുന്നത്. മലയാളികളുടെ പ്രിയങ്കരനായ മോഹന്‍ലാല്‍ ആദ്യമായി രജനികാന്തിനൊപ്പം അഭിനയിക്കുന്നു എന്ന പ്രത്യേകതയും ചിത്രത്തിനുണ്ട്. മുത്തുവേല്‍ പാണ്ഡ്യന്‍ എന്ന ജയിലറുടെ വേഷത്തിലാണ് രജനികാന്ത് എത്തുന്നത്.
തമന്നയാണ് ചിത്രത്തില്‍ നായികയായി എത്തുന്നത്. സൗത്ത് ഇന്ത്യയിലെ പ്രധാന നായകന്മാരും താരങ്ങളും ചിത്രത്തില്‍ കഥാപാത്രങ്ങളായി എത്തുന്നുണ്ട്. ദളപതി വിജയ് നായകനായെത്തിയ ബീസ്റ്റ് എന്ന ചിത്രത്തിന് ശേഷം നെല്‍സന്‍ സംവിധാനം ചെയ്യുന്ന ചിത്രം കൂടിയാണ് ജയിലര്‍. സ്റ്റണ്ട് ശിവയാണ് ചിത്രത്തിന്റെ ആക്ഷന്‍. വിജയ് കാര്‍ത്തിക് കണ്ണനാണ് ഛായാഗ്രാഹണം. സ്വാതന്ത്ര്യദിനത്തോടനുബന്ധിച്ചുള്ള വെള്ളിയാഴ്ചയാണ് ചിത്രം റിലീസിനെത്തുന്നത്. രമ്യ കൃഷ്ണന്‍, വിനായകന്‍, ശിവ്രാജ് കുമാര്‍, ജാക്കി ഷ്‌റോഫ്, സുനില്‍ തുടങ്ങിയ വമ്പന്‍ താരനിരയും ചിത്രത്തില്‍ അണിനിരക്കുന്നുണ്ട്.
കേരളത്തിലെ വിതരണാവകാശം ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലന്‍ സ്വന്തമാക്കി. ദളപതി വിജയുടെ അടുത്ത ചിത്രം ലിയോയും തീയേറ്ററില്‍ എത്തിക്കുന്നത് ഗോകുലം മൂവീസ് തന്നെയാണ്. ഡ്രീം ബിഗ് ഫിലിംസാണ് ചിത്രത്തിന്റെ ഡിസ്ട്രിബ്യുഷന്‍ പാര്‍ട്ണര്‍.
Recent Comments