ലോകേഷ് കനകരാജ് സംവിധാനം ചെയ്യുന്ന ‘വിക്ര’ത്തിന്റെ (Vikram Movie) പ്രമോഷനുമായി ബന്ധപ്പെട്ട് മെയ് 27 ന് കമല്‍ഹാസന്‍ (Kamal Haasan) കേരളത്തിലെത്തും. രാവിലെ 6.45 നുള്ള ഇന്‍ഡിഗോയുടെ ഫ്‌ളൈറ്റിലാണ് കമല്‍ ചെന്നൈയില്‍നിന്ന് പുറപ്പെടുന്നത്. 7.45 ന് നെടുമ്പാശ്ശേരി വിമാനത്താവളത്തിലെത്തുന്ന കമല്‍ അവിടെനിന്ന് ഹെലികോപ്ടറില്‍ ഫ്‌ളവേഴ്‌സ് ചാനലിന്റെ മനീടിലുള്ള സ്റ്റുഡിയോഫ്‌ളോറിലെത്തും. 8.30 മുതല്‍ 11.30 വരെയാണ് ചാനല്‍ പരിപാടിക്കായി കമല്‍ സമയം നീക്കിവച്ചിരിക്കുന്നത്. അവിടുന്ന് വീണ്ടും ഹെലികോപ്ടറില്‍ ഇടപ്പള്ളി അമൃത ഹോസ്പിറ്റല്‍ ഗ്രൗണ്ടിലെ ഹെലിപാഡില്‍ ഇറങ്ങുന്ന കമല്‍ കാര്‍ മാര്‍ഗ്ഗം ലുലു മാരിയറ്റിലെത്തും. അവിടെയാണ് വിശ്രമം. മൂന്ന് മണി മുതല്‍ ഓണ്‍ലൈന്‍ ചാനലുകള്‍ക്കുള്ള പ്രൊമോഷന്‍ പരിപാടിയില്‍ പങ്കുകൊള്ളും. 4.30 മുതലാണ് പ്രസ്മീറ്റ്. ഫാന്‍സുകാരുമായുള്ള സംവാദവും ഇതിനോടനുബന്ധിച്ച് നടക്കും. ഈ പരിപാടിയിലേയ്ക്ക് പുറമേ നിന്നുള്ളവര്‍ക്കും പ്രവേശനം അനുവദിച്ചിട്ടുണ്ട്. ആറ് മണിയോടെ നെടുമ്പാശ്ശേരിയിലേയ്ക്ക് തിരിക്കുന്ന കമല്‍ എട്ട് മണിക്കുള്ള എയര്‍ ഇന്ത്യ ഫ്‌ളൈറ്റില്‍ മുംബയിലേയ്ക്ക് പോകും. കമല്‍ഹാസന്റെ കേരളത്തിലെ പ്രോഗ്രാം ഷെഡ്യൂള്‍ ഇപ്രകാരമാണ്.
വിക്രത്തിന്റെ പ്രമോഷന്‍ പരിപാടിയില്‍ സംവിധായകന്‍ ലോകേഷ് കനകരാജും നിര്‍മ്മാതാക്കളില്‍ ഒരാളാണ് മഹേന്ദ്രനും കേരളത്തില്‍ ചിത്രം വിതരണത്തിനേറ്റെടുത്തിരിക്കുന്ന ഷിബു തമീന്‍സും പങ്കെടുക്കുന്നുണ്ട്. കമലിനെ സ്വീകരിക്കുന്നത് നടന്‍ ഫഹദ് ഫാസിലാണ്. ചിത്രത്തില്‍ അഭിനയിക്കുന്ന മലയാളി താരങ്ങളായ നരേന്‍, കാളിദാസ് ജയറാം, ചെമ്പന്‍ വിനോദ് എന്നിവരെയും പരിപാടിയിലേയ്ക്ക് ക്ഷണിച്ചിട്ടുണ്ട്.
ജൂണ്‍ 3 നാണ് വിക്രം പ്രദര്‍ശനത്തിനെത്തുന്നത്. ഷിബു തമീന്‍സിന്റെ ഉടമസ്ഥതയിലുള്ള എച്ച്.ആര്‍. പിക്‌ചേഴ്‌സാണ് കേരളത്തിലെ വിതരണക്കാര്‍.
Recent Comments