കെ.പി.എ.സി. ലളിത തമിഴില്‍ അവസാനമായി അഭിനയിച്ച ചിത്രമാണ് വീട്ട്‌ല വിശേഷം. ആര്.ജെ. ബാലാജിയും അപര്‍ണ്ണ ബാലമുരളിയുമാണ് ചിത്രത്തിലെ കേന്ദ്രകഥാപാത്രങ്ങളെ അവതരിപ്പിക്കുന്നത്. ഇപ്പോഴിതാ ചിത്രത്തിന്റെ ട്രെയിലര്‍ അണിയറക്കാര്‍ പുറത്ത് വിട്ടിരിക്കുകയാണ്.
ഫണ്‍ ഫാമിലി എന്റര്‍ടെയിനറായ ചിത്രം സൂപ്പര്‍ഹിറ്റ് ബോളിവുഡ് ചിത്രമായ ‘ബദായി ഹോ’യുടെ റീമേക്കാണ്. മലയാളികളുടെ പ്രിയ താരം ഉര്‍വശിയും ചിത്രത്തില്‍ ഒരു പ്രധാന വേഷം കൈകര്യം ചെയ്യുന്നു. ഉര്‍വശിയുടെ ഭര്‍ത്താവായി സത്യരാജ് വേഷമിടുന്നു. ആര്.ജെ. ബാലാജിയും എന്‍ ജെ ശരവണനും ചേര്‍ന്നാണ് വീട്ട്‌ല വിശേഷം സംവിധാനം ചെയ്തിരിക്കുന്നത്.
കഴിഞ്ഞ ദിവസം ഐപിഎല്‍ മല്‍സരത്തിനിടെയാണ് നര്‍മ്മസമ്പന്നമായ രംഗങ്ങള്‍ കോര്‍ത്തിണക്കിയ ചിത്രത്തിന്റെ ട്രെയിലര്‍ പുറത്ത് വന്നത്. മദ്യവയസ്‌കരായ ദമ്പതികള്‍ക്ക് വീണ്ടും ഒരു കുഞ്ഞ് ജനിക്കാന്‍ പോകുന്നതാണ് ചിത്രത്തിന്റെ ഇതിവൃത്തം. യോഗി ബാബു, പവിത്ര ലോകേഷ്, വിശ്വേശ് എന്നിവരാണ് മറ്റ് താരങ്ങള്‍. ജൂണ്‍ 17ന് ചിത്രം റിലീസ് ചെയ്യും. 2018 ല്‍ പുറത്തിറങ്ങിയ ‘ബദായി ഹോ’യില്‍ ആയുഷ്മാന്‍ ഖുറാന ആയിരുന്നു നായകന്‍. ചിത്രം 219 കോടി ആണ് ബോക്‌സ് ഓഫിസ് കളക്ഷന്‍ നേടിയത്.
Recent Comments