ഗൗതം മേനോന്റെ സംവിധാനത്തില്‍ ചിമ്പു നായകനാകുന്ന ‘വെന്ത് തനിന്തത് കാടിലെ’ ഉന്നെ നെനച്ചതും മനസ്സ് മയങ്ങുതേ എന്ന തുടങ്ങുന്ന ഗാനത്തിന്റെ ലിറിക്കല്‍ വീഡിയോ റിലീസായി. എ.ആര്‍. റഹ്‌മാന്റെ സംഗീത സംവിധാനത്തില്‍ ശ്രേയഘോഷാല്‍, സര്‍താക് കല്യാണി എന്നിവരാണ് പാടിയിരിക്കുന്നത്. താമരയാണ് ഗാനരചന. വിവിധ ഗെറ്റപ്പുകളില്‍ ചിമ്പു പ്രത്യക്ഷപ്പെടുന്ന ചിത്രമാണ് വെന്ത് തനിന്തത് കാട്. വിണ്ണൈ താണ്ടി വരുവായാ, അച്ചം യെണ്‍പത് മടമൈയെടാ എന്നീ ചിത്രങ്ങള്‍ക്ക് ശേഷം ഗൗതം മേനോനും ചിമ്പുവും ഒന്നിക്കുന്ന ചിത്രംകൂടിയാണിത്.
കഴിഞ്ഞ ആഴ്ച ചിത്രത്തിന്റെ ആഡിയോ ലോഞ്ച് ചെന്നൈയില്‍ നടന്നിരുന്നു. കമല്‍ഹാസനായിരുന്നു മുഖ്യാതിഥി.
രണ്ടു ഭാഗങ്ങളിലായി ഇറങ്ങുന്ന സിനിമയുടെ ആദ്യ പാര്‍ട്ടിന്റെ ട്രെയിലറിന് ഗംഭീര സ്വീകരണമാണ് ലഭിച്ചത്. ട്രെന്‍ഡിങ്ങില്‍ മുന്നിലുള്ള ചിത്രത്തിന്റെ ട്രെയിലര്‍ 18 ലക്ഷം പേരാണ് ഇതുവരെ കണ്ടത്. രണ്ടാം ഭാഗം വരുന്നുണ്ട് എന്ന സൂചനയും ട്രെയിലര്‍ നല്‍കുന്നു. മലയാളി താരങ്ങളായ നീരജ് മാധവ്, സിദ്ദിഖ് എന്നിവരും പ്രധാനവേഷങ്ങളിലുണ്ട്. രാധിക ശരത്കുമാറും താരനിരയിലെ ശക്തമായ സ്ത്രീകഥാപാത്രമാണ്.
ജയമോഹന്റേതാണ് തിരക്കഥ. സിദ്ധാര്‍ത്ഥ നൂനിയാണ് ക്യാമറ. വേല്‍സ് ഫിലിംസ് ഇന്റര്‍നാഷണല്‍ ലിമിറ്റഡിന്റെ ബാനറില്‍ ഡോ. ഇഷാരി കെ ഗണേഷാണ് ചിത്രം നിര്‍മിച്ചിരിക്കുന്നത്. ഉദയ നിധി സ്റ്റാലിന്റെ റെഡ് ജയന്റ് മൂവീസ് ചിത്രത്തിന്റെ വിതരണത്തില്‍ പങ്കാളികളാണ്. കേരളത്തില്‍ ഷിബു തമീന്‍സിന്റെ നേതൃത്വത്തിലുള്ള റിയാ ഷിബുവിന്റെ എച്ച് ആര്‍ പിക്‌ചേഴ്‌സ് കേരളത്തില്‍ വിതരണത്തിനെത്തിക്കുന്നു. ഈ മാസം 15-ന് ചിത്രം തിയേറ്ററുകളിലെത്തും. പിആര്‍ഒ പ്രതീഷ് ശേഖര്‍.
Recent Comments