സംവിധായകന്‍ എബ്രിഡ് ഷൈന്‍ നിവിന്‍ പോളി, ആസിഫ് അലി എന്നിവരെ പ്രധാന കഥാപാത്രങ്ങളാക്കി ഒരുക്കിയ ടൈം ട്രാവല്‍ ഫാന്റസി ഡ്രാമ ‘മഹാവീര്യര്‍’ ട്രെയിലര്‍ പുറത്ത്. ദൈവമുണ്ട് എന്ന് തെളിയിക്കാന്‍ ശ്രമിക്കുന്ന ഒരു സന്യാസിയായാണ് നിവിന്‍ പോളി ചിത്രത്തില്‍ പ്രത്യക്ഷപ്പെടുന്നത്. ഒരു കോര്‍ട്ട് റൂം സീനിലൂടെയാണ് ട്രെയിലര്‍ തുടങ്ങുന്നത്.
യുക്തിയും വിശ്വാസവും തമ്മിലുള്ള പോരാട്ടം ടൈം ട്രാവലിന്റെ കൂട്ട് പിടിച്ച് കഥ പറയുന്ന രീതിയാണ് ചിത്രം അവലംബിച്ചിരിക്കുന്നത്. ഭൂത കാലത്തിലെ ഒരു രാജ്യത്തെ യോദ്ധാവായാണ് ആസിഫ് അലി എത്തുന്നത്. നായികയായി കന്നഡ താരം ഷാന്‍വി ശ്രീവസ്തവ എത്തുന്നു. കൂടാതെ ലാല്‍, ലാലു അലക്‌സ്, സിദ്ദിഖ്, മല്ലിക സുകുമാരന്‍, കലാഭവന്‍ പ്രജോദ്, മേജര്‍ രവി എന്നിവര്‍ മറ്റ് വേഷങ്ങളില്‍ എത്തുന്നു.
മലയാളത്തില്‍ ഇത് ആദ്യമായാണ് ഒരു ടൈം ട്രാവല്‍ ചിത്രം ഒരുങ്ങുന്നത്. കഴിഞ്ഞ ദിവസം പുറത്തിറങ്ങിയ ചിത്രത്തിന്റെ ട്രെയിലര്‍ ഇതിനോടകം ട്രെന്‍ഡിംഗ് ലിസ്റ്റില്‍ ഇടം പിടിച്ചിട്ടുണ്ട്. പോളി ജൂനിയര്‍ പിക്‌ചേഴ്‌സ്, ഇന്ത്യന്‍ മൂവി മേക്കേഴ്‌സ് എന്നീ ബാനറുകള്‍ക്ക് വേണ്ടി നിവിന്‍ പോളിയും പി. എസ് ഷംനാസും ചേര്‍ന്നാണ് മഹാവീര്യര്‍ നിര്‍മ്മിക്കുന്നത്. ചിത്രം ജൂലൈ 21 നാണ് തീയേറ്ററുകളില്‍ റിലീസ് ചെയുന്നത്.
Recent Comments