ഏറെ ചര്‍ച്ച ചെയ്യപ്പെടുകയും മികച്ച വിജയം നേടുകയും ചെയ്ത തിങ്കളാഴ്ച്ച നിശ്ചയം എന്ന ചിത്രത്തിലെ കേന്ദ്ര കഥാപാത്രത്തെ അവതരിപ്പിച്ച മനോജ് കെ.യു. നായകനാകുന്ന ചിത്രമാണ് പുഞ്ചിരി മുറ്റത്ത് ഇട്ടിക്കോര. പാപ്പച്ചന്‍ ഒളിവിലാണ് എന്ന ചിത്രത്തിലൂടെ ശ്രദ്ധേയനായ സിന്റോ സണ്ണിയാണ് ഈ ചിത്രം സംവിധാനം ചെയ്യുന്നത്.
ബെന്‍ഹര്‍ഫിലിംസിന്റെ ബാനറില്‍ മാനുവല്‍ ബിജു നിര്‍മ്മിക്കുന്ന ചിത്രത്തിന്റെ ഷൂട്ടിംഗ് തൃപ്പൂണിത്തുറയില്‍ പുരോഗമിക്കുന്നു.
അണുകുടുംബസംസ്‌കാരത്തിലേക്കു കടന്ന മനുഷ്യ ജീവിതം തികച്ചും സ്വാര്‍ത്ഥ പരമായി മാറിയിരിക്കുന്നു. താനും തന്റെ കുടുംബവുമായി ഒതുങ്ങുക. നഗരജീവിതത്തിലാണ് ഇത് ഏറ്റവും കൂടുതല്‍ പ്രകടമാകുന്നത്. സമൂഹവുമായി യാതൊരു ബന്ധവും ഇക്കൂട്ടര്‍ക്കില്ല. അയല്‍വാസികളാരെന്നോ എന്തു ചെയ്യുന്നുവെന്നോ എന്നൊന്നും അറിയുന്നില്ല. ബന്ധങ്ങളും, സൗഹൃദങ്ങളും അകലുന്നു. അവര്‍ സ്വയം സൃഷ്ടിച്ച വേലിക്കെട്ടുകളില്‍ ഒതുങ്ങുന്നു. ഇത്തരക്കാരുടെ ഇടയിലേക്ക് അപ്രതീക്ഷിതമായി ഒരാള്‍ കടന്നു വരുന്നു. പുഞ്ചിരി മുറ്റത്ത് ഇട്ടിക്കോര.
ഈ നാട്ടിലെ ജനങ്ങളുമായി ഇട്ടിക്കോര പിന്നിട് ഇഴുകിച്ചേരുന്നു. ഇതിലൂടെ നാട്ടുകാര്‍ക്കിടയില്‍ ഉണ്ടാകുന്ന അത്ഭുതകരമായ മാറ്റങ്ങളാണ് പൂര്‍ണ്ണമായും നര്‍മ്മമുഹൂര്‍ത്തങ്ങളിലൂടെ അവതരിപ്പിക്കുന്നത്. ഗൗരവമായ ഒരു വിഷയം നര്‍മ്മത്തിലൂടെ പറയുകയാണ് ഈ ചിത്രത്തിലൂടെ. നമ്മുടെ നഗര ജീവിതത്തിന്റെ ഒരു നേര്‍ക്കാഴ്ച്ച എന്ന് ഈ ചിത്രത്തെക്കുറിച്ചു പറയാം.
അന്നാ റെജി കോശിയാണ് നായിക. രജനീകാന്ത് ചിത്രമായ വേട്ടയ്യനില്‍ മുഖ്യ വേഷത്തിലെത്തിയ തന്‍മയസോള്‍ ഈ ചിത്രത്തില്‍ സുപ്രധാനമായ ഒരു കഥാപാത്രത്തെ അവതരിപ്പിക്കുന്നു. ജാഫര്‍ ഇടുക്കി, ജയിംസ് എല്യാ വിനീത് തട്ടില്‍, പ്രമോദ് വെളിയനാട്, സജിന്‍ ചെറുകയില്‍ കലാഭവന്‍ റഹ്‌മാന്‍, ശ്രുതി ജയന്‍, ശ്രീധന്യ, ആര്‍ട്ടിസ്റ്റ് കുട്ടപ്പന്‍, മനോഹരിയമ്മ. പൗളി വത്സന്‍. ഷിനു ശ്യാമളന്‍, ജസ്‌നിയാ കെ. ജയദീഷ്, തുഷാരാ, അരുണ്‍ സോള്‍, പ്രിയാ കോഴിക്കോട് എന്നിവരും പ്രധാന വേഷങ്ങളിലെത്തുന്നു.
ബിജു ആന്റണിയുടേതാണ് കഥയും തിരക്കഥയും, സംഭാഷണവും, സംഗീതം ശങ്കര്‍ ശര്‍മ്മ, ഛായാഗ്രഹണം റോജോ തോമസ്, എഡിറ്റിംഗ് അരുണ്‍. ആര്.എസ്, കലാസംവിധാനം സൂരജ് കുറവിലങ്ങാട്, മേക്കപ്പ് മനോജ് കിരണ്‍ രാജ്, കോസ്റ്റ്യൂം ഡിസൈന്‍ സുജിത് മട്ടന്നൂര്‍, ചീഫ് അസ്സോസ്സിയേറ്റ് ഡയറക്ടര്‍ ഷാബില്‍ അസീസ്, അസ്സോസ്സിയേറ്റ് ഡയറക്ടര്‍ സച്ചി ഉണ്ണികൃഷ്ണന്‍, ക്രിയേറ്റീവ് കോണ്‍ട്രിബ്യൂട്ടര്‍ മജു രാമന്‍, പ്രൊഡക്ഷന്‍ കണ്‍ട്രോളര്‍ സഫി ആയൂര്‍, പി.ആര്.ഒ വാഴൂര്‍ ജോസ്.
Recent Comments