എംടി വാസുദേവന്‍ നായരുടെ ഒന്‍പത് കഥകളെ ആസ്പദമാക്കി ഒരുങ്ങുന്ന ആന്തോളജി ചലിച്ചിത്രം ‘മനോരഥങ്ങള്‍’ ട്രെയിലര്‍ പുറത്തിറങ്ങി. ആഗസ്റ്റ് 15ന് ഈ അന്തോളജി ചിത്രം റിലീസ് ചെയ്യും. ഒന്നര മിനിറ്റ് ദൈര്‍ഘ്യമുള്ള ട്രെയ്‌ലറില്‍ ഒന്‍പത് കഥകളുടെ ഗ്ലിംപ്‌സസ് കാണിച്ചു പോകുന്നുണ്ട്. മമ്മൂട്ടി, മോഹന്‍ലാല്‍, ആസിഫ് അലി, ഫഹദ് ഫാസില്‍, ബിജു മേനോന്‍, ഇന്ദ്രജിത്ത് സുകുമാരന്‍ തുടങ്ങിയവര്‍ ചിത്രത്തില്‍ ഭാഗമാവുന്നു.
പ്രിയദര്‍ശന്‍ സംവിധാനം ചെയ്യുന്ന ‘ഓളവും തീരവും’ എന്ന ചിത്രത്തിലാണ് മോഹന്‍ലാല്‍ അഭിനയിക്കുന്നത്. ഓളവും തീരവും എന്ന പഴയ ചിത്രത്തിന്റെ സംക്ഷിപ്ത രൂപമാണ് ഈ സെഗ്മെന്റ്. ബിജു മേനോനെ നായകനാക്കി ‘ശിലാലിഖിതം’ സംവിധാനം ചെയ്യുന്നതും പ്രിയദര്‍ശനാണ്. മമ്മൂട്ടിയെ നായകനാക്കി എംടിയുടെ ആത്മകഥാംശമുളള ‘കടുഗണ്ണാവ ഒരു യാത്രക്കുറിപ്പ്’ സംവിധാനം ചെയ്യുന്നത് രഞ്ജിത്താണ്. കടുഗണ്ണാവ, നിന്റെ ഓര്‍മയ്ക്കായി എന്നീ രണ്ട് ചെറുകഥളുടെയും സംയോജനമാണ് ഈ ചിത്രം.
മഹേഷ് നാരായണനും ഫഹദ് ഫാസിലും ചേര്‍ന്ന് പ്രശസ്ത ചെറുകഥയായ ‘ഷെര്‍ലക്’ല്‍ അഭിനയിക്കുന്നു. സന്തോഷ് ശിവന്‍ സംവിധാനം ചെയ്യുന്ന ‘അഭയം തേടി വീണ്ടും’ എന്ന സിനിമയില്‍ സിദ്ദിഖ് അഭിനയിക്കുമ്പോള്‍, നെടുമുടി വേണു, സുരഭി, ഇന്ദ്രന്‍സ് എന്നിവരെ അവതരിപ്പിക്കുന്ന ‘സ്വര്‍ഗം തുറക്കുന്ന സമയം’ ജയരാജ് സംവിധാനം ചെയ്യുന്നു. ശ്യാമപ്രസാദ് സംവിധാനം ചെയ്യുന്ന കാഴ്ച എന്ന ചിത്രത്തിലാണ് പാര്‍വതി തിരുവോത്ത് അഭിനയിക്കുന്നത്. ഇന്ദ്രജിത്തിനും അപര്‍ണ ബാലമുരളിക്കുമൊപ്പം രതീഷ് അമ്പാട്ട് സംവിധാനം ചെയ്ത ‘കടല്‍ക്കാറ്റ്’ ഒരുങ്ങുന്നു. ബന്ധനം എന്ന ചെറുകഥയുടെ ദൃശ്യാവിഷ്‌കാരമാണ് കടല്‍ക്കാറ്റ് . ആസിഫ് അലി, മധുബാല എന്നിവരെ കേന്ദ്രകഥാപാത്രങ്ങളാക്കി എം.ടി.യുടെ മകള്‍ അശ്വതി ആദ്യമായി സംവിധാനം ചെയ്യുന്ന ‘വില്‍പ്പന’ എന്നിവയാണ് സീരീസിലെ മറ്റു ചിത്രങ്ങള്‍.
Recent Comments