നമ്മുടെ ജീവിതത്തിലെ ഓരോ സന്തോഷവും ഓര്‍ക്കാനായി സോഷ്യല്‍മീഡിയയില്‍ പോസ്റ്റ് ചെയ്യുന്നവരാണ് നമ്മള്‍ ഓരോരുത്തരും. എന്നാല്‍ കലാലയജീവിതം തുടങ്ങുന്ന ആദ്യ ദിവസത്തെ ഓര്‍മ്മയ്ക്കായി കരുതിവയ്ക്കുകയാണ് സിനിമാതാരവും അവതാരകയുമായ മീനാക്ഷി.
കോളേജിലെ പ്രധാന അദ്ധ്യാപകന്റെ ഓഫീസില്‍നിന്നും പകര്‍ത്തിയ ചിത്രത്തിന് ‘മണര്‍കാട് കോളേജ് ഞാന്‍ ഇങ്ങെടുക്കുവാ’ എന്ന അടിക്കുറിപ്പുമായി സോഷ്യല്‍ മീഡിയയില്‍ പോസ്റ്റ് ചെയ്തിരിക്കുകയാണ് താരം. കുറച്ചു ദിവസം മുമ്പാണ് അച്ഛന്‍ അനൂപ് പഠിച്ച മണര്‍കാട് സെന്റ് മേരീസ് കോളേജില്‍ ഇംഗ്ലീഷ് സാഹിത്യത്തില്‍ ബിരുദത്തിന് മീനാക്ഷി പ്രവേശനം നേടിയത്. അച്ഛനൊപ്പം എത്തിയാണ് മീനാക്ഷി അഡ്മിഷന്‍ എടുത്തിരുന്നത്. രസകരമായ അടിക്കുറിപ്പോടുകൂടി പങ്കുവച്ച ആ ചിത്രവും സോഷ്യല്‍മീഡിയയില്‍ വൈറലായിരുന്നു.
‘എടുത്താന്‍ പൊങ്ങുമോ മീനൂട്ടീ’, ‘കോളേജ് എടുത്തുകൊണ്ട് പോകരുതേ, ലേശം ബാക്കി വച്ചേക്കണേ’, ‘കോളേജിന്റെ ആധാരം ആണോ അദ്ധ്യാപകന്‍ തരുന്നത്’ എന്നിങ്ങനെയുള്ള കമന്റുകളുമായി ഒരുപാടുപേര്‍ മീനൂട്ടിയുടെ സന്തോഷത്തില്‍ പങ്കുചേര്‍ന്നു.
ഒപ്പം, അമര്‍ അക്ബര്‍ ആന്റണി, ജമ്‌നാപ്യാരി, ഒരു മുത്തശ്ശി ഗഥ, ആന മയില്‍ ഒട്ടകം തുടങ്ങി നിരവധി സിനിമകളില്‍ ബാലതാരമായി മീനാക്ഷി അഭിനയിച്ചിട്ടുണ്ട്. ഒപ്പത്തിലെ നന്ദിനിക്കുട്ടിയും അമര്‍ അക്ബര്‍ ആന്റണിയിലെ ഫാത്തിമയും ഏറെ ശ്രദ്ധ നേടി. ഫ്‌ളവേഴ്‌സ് ടോപ് സിംഗര്‍ അവതാരക എന്ന നിലയിലും മീനാക്ഷി ശ്രദ്ധ നേടിയിട്ടുണ്ട്.
പാലാ പാദുവ സ്വദേശികളായ അനൂപിന്റെയും രമ്യയുടെയും മകളായ മീനാക്ഷി ളാക്കാട്ടൂര്‍ എംജിഎംഎസ്എസ് ഹയര്‍ സെക്കന്‍ഡറി സ്‌ക്കൂളിലായിരുന്നു പ്ലസ്ടു പഠനം പൂര്‍ത്തികരിച്ചത്. അനുനയ അനൂപ് എന്നാണ് യഥാര്‍ത്ഥ പേര്.
Recent Comments