ആറാട്ടിന്റെ ട്രെയിലര്‍ ഇറങ്ങിയിട്ട് നിമിഷങ്ങളേയായിട്ടുള്ളൂ. ട്രെയിലര്‍ കണ്ടുകഴിഞ്ഞപ്പോള്‍ ഒന്നുറപ്പിച്ചു. മുമ്പ് മോഹന്‍ലാല്‍ പറഞ്ഞാണ്. മരയ്ക്കാര്‍ ഇറങ്ങിയതിന് പിന്നാലെ. ‘എന്റെ മാസ്സ് ചിത്രമാണ് പ്രേക്ഷകര്‍ പ്രതീക്കുന്നതെങ്കില്‍ ആറാട്ട് അതുപോലൊരു ചിത്രമായിരിക്കും.’ ലാലിന്റെ വാക്കുകള്‍ അക്ഷരാര്‍ത്ഥത്തില്‍ ശരിയാണെന്ന് ആറാട്ടിന്റെ ട്രെയിലറും ഓര്‍മ്മിപ്പിക്കുന്നു.
രണ്ടര മിനിറ്റിലേറെ ദൈര്‍ഘ്യമുള്ള ട്രെയിലറില്‍ ഒരു മാസ്സ് ചലച്ചിത്രത്തിന്റെ എല്ലാ ചേരുവകളും ഉണ്ട്. അടിക്ക് അടി, പാട്ടിന് പാട്ട്, ഡാന്‍സിന് ഡാന്‍സ്, ഡയലോഗിന് കട്ട ഡയലോഗ്, പാകത്തിന് തെലുങ്ക് ഫ്‌ളേവറും. തീര്‍ച്ചയായും ലാലിന്റെ മാസ്സ് സിനിമകള്‍ ഇഷ്ടപ്പെടുന്ന പ്രേക്ഷകരെ ഇത് തൃപ്തിപ്പെടുത്തുമെന്നുതന്നെ കരുതണം.
ഉദയന്റെ തിരക്കഥയില്‍ ബി. ഉണ്ണികൃഷ്ണന്‍ സംവിധാനം ചെയ്യുന്ന ചിത്രമാണ് നെയ്യാറ്റിന്‍കര ഗോപന്റെ ആറാട്ട്. ചിത്രീകരണം കഴിഞ്ഞവര്‍ഷം തന്നെ പൂര്‍ത്തിയായിരുന്നു. കോവിഡ് സകലതിനെയും സ്തബ്ധമാക്കിയപ്പോള്‍ ആറാട്ടിനെയും അത് ബാധിച്ചുവെന്നുമാത്രം.
വന്‍ താരനിരയാണ് ചിത്രത്തിലുള്ളത്. സായ് കുമാര്‍, സിദ്ധിഖ്, വിജയരാഘവന്‍, നെടുമുടിവേണു, ജോണി ആന്റണി, നന്ദു, കോട്ടയം രമേഷ്, ഇന്ദ്രന്‍സ്, ശിവജി ഗുരുവായൂര്‍, കൊച്ചുപ്രേമന്‍, അനൂപ് ഡേവിഡ്, രവികുമാര്‍, പ്രഭാകര്‍, ശ്രദ്ധ ശ്രീനാഥ്, രചന നാരായണന്‍കുട്ടി, സ്വാസിക, മാളവിക മേനോന്‍, നേഹ സക്‌സേന, സീത എന്നിവര്‍ക്കൊപ്പം കെജിഎഫിലെ ഗരുഡ എന്ന കഥാപാത്രത്തിലൂടെ ശ്രദ്ധേയനായ രാമചന്ദ്രബാബുവും ചിത്രത്തിലുണ്ട്.
Recent Comments