നാലര പതിറ്റാണ്ട് പിന്നിട്ട നീണ്ട അഭിനയസപര്യയുടെ തുടര്‍ച്ചയായി, മോഹന്‍ലാല്‍ സംവിധാനം ചെയ്യുന്ന ആദ്യ ചിത്രമാണ് ബറോസ്. ഒരു മാജിക്കല്‍ അഡ്വഞ്ചര്‍ എന്ന് വിശേഷിപ്പിക്കാവുന്ന ചിത്രത്തിന്റെ റിലീസ് പ്രഖ്യാപിച്ചിരിക്കുകയാണ് മോഹന്‍ലാല്‍. താരം തന്റെ സോഷ്യല്‍മീഡിയ പേജിലൂടെയാണ് ചിത്രത്തിന്റെ റിലീസ് തീയതി (ഒക്ടോബര്‍ 3) പ്രഖ്യാപിച്ചിരിക്കുന്നത്.
രണ്ട് വര്‍ഷമായി ചിത്രത്തിന്റെ അണിയറ പ്രവര്‍ത്തനങ്ങള്‍ തുടങ്ങി അവസാനിച്ചിട്ട്. ഒട്ടേറെ വിദേശതാരങ്ങളും സാങ്കേതിക പ്രവര്‍ത്തകരും ചിത്രത്തിന്റെ ഭാഗമാകുന്നുണ്ട്. എല്ലാത്തിന്റെയും അമരക്കാരനായി ലാല്‍ അതിനെ നിയന്ത്രിച്ചുപോന്നു. മലയാള ഭാഷചിത്രമായി ബറോസിനെ ഒതുക്കിനിര്‍ത്താനാവില്ലെന്ന് മോഹന്‍ലാല്‍ തന്നെ പറഞ്ഞിട്ടുണ്ട്. ഇതൊരു അന്തര്‍ദ്ദേശീയ മാനമുള്ള ചിത്രമാണ്. ഏത് ഭാഷയ്ക്കും അനുഗുണമാണ് അതിന്റെ തീം. അതുകൊണ്ടുതന്നെ ലോകമെമ്പാടുമുള്ള തീയേറ്ററുകളിലായി ചിത്രം പ്രദര്‍ശനത്തിനെത്താന്‍ ഒരുങ്ങുകയാണ്.
ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ഈ ബ്രഹ്‌മാണ്ഡ ചിത്രം നിര്‍മ്മിച്ചിരിക്കുന്നത്. ആശിര്‍വാദിനൊപ്പം പാര്‍സ് ഫിലിം കമ്പനിയും ചേര്‍ന്നാണ് ചിത്രം വിതരണത്തിനെത്തിക്കുന്നത്. സന്തോഷ് ശിവനാണ് ഈ 3ഡി ചിത്രത്തിന്റെ സിനിമാറ്റോഗ്രാഫര്‍. ടി.കെ. രാജീവ് കുമാറാണ് ചിത്രത്തിന്റെ ക്രിയേറ്റീവ് ഹെഡ്. സന്തോഷ് രാമന്‍ പ്രൊഡക്ഷന്‍ ഡിസൈനറുമാണ്. കിലിയനും ലിഡിയന്‍ നാദസ്വരവും ചേര്‍ന്നാണ് സംഗീതവിഭാഗം കൈകാര്യം ചെയ്തിരിക്കുന്നത്.
Recent Comments