പ്രൊഡ്യൂസേഴ്‌സ് അസോസിയേഷന്റെ ആഭിമുഖ്യത്തില് താരഷോ സംഘടിപ്പിക്കുന്നു. ഇത് രണ്ടാംതവണയാണ് അസോസിയേഷന്റെ ഫണ്ട് ശേഖരണാര്‍ത്ഥം അമ്മയുമായി ചേര്‍ന്ന് സ്റ്റേജ് ഷോ സംഘടിപ്പിക്കുന്നത്. മോളിവുഡ് മാജിക് എന്നാണ് ഇത്തവണ ഷോയ്ക്ക് നല്‍കിയിരിക്കുന്ന പേര്. നവംബര്‍ 17 ഖത്തറിലെ 974 സ്‌റ്റേഡിയത്തിലാണ് താരഷോ അരങ്ങേറുന്നത്.
ഷോയ്ക്ക് മുന്നോടിയായി റിഹേഴ്‌സല്‍ ക്യാമ്പ് നടക്കും. നവംബര്‍ 9 ന് എറണാകുളത്താണ് റിഹേഴ്‌സല്‍ ആരംഭിക്കുന്നത്. മമ്മൂട്ടി, മോഹന്‍ലാല്‍, ദിലീപ് ഉള്‍പ്പെടെ മുന്‍നിര താരങ്ങളെല്ലാം ഷോയുടെ ഭാഗമാകും. എം.ജി. ശ്രീകുമാര്‍, സ്റ്റീഫന്‍ ദേവസി തുടങ്ങിയവരുടെ നേതൃത്വത്തിലുള്ള സംഗീതഭാഗവും ഷോയുടെ ഹൈലൈറ്റാകും. 190 പേര് അടങ്ങുന്ന സംഘമാണ് ഷോയുടെ ഭാഗമായി ഖത്തറിലേയ്ക്ക് പോകാനൊരുങ്ങുന്നത്. നവംബര്‍ 15 ന് അവര്‍ ഖത്തറിലേയ്ക്ക് തിരിക്കും. എം. രഞ്ജിത്ത്, നാദിര്‍ഷ, ഇടവേള ബാബു ഇവരാണ് ഷോയുടെ ഡയറക്ടര്‍മാര്‍.
പ്രൊഡ്യൂസേഴ്‌സ് അസോസിയേഷന്റെ ആസ്ഥാന മന്ദിരം എറണാകുളത്ത് പണികഴിപ്പിച്ചതുമായി ബന്ധപ്പെട്ട് വലിയൊരു സാമ്പത്തിക ബാധ്യത അസോസിയേഷന് ഉണ്ടായിട്ടുണ്ട്. താരഷോയില്‍നിന്ന് ലഭിക്കുന്ന തുക പ്രധാനമായും അതിനുവേണ്ടിയാണ് വിനിയോഗിക്കുന്നതും. ഏഷ്യാനെറ്റാണ് ഷോയുടെ സാറ്റ്‌ലൈറ്റ്-ഡിജിറ്റല്‍ റൈറ്റ്‌സ് സ്വന്തമാക്കിയിരിക്കുന്നത്.
Recent Comments