പ്രണയത്തിന് കാലമോ, പ്രായമോ ഒന്നും തടസ്സങ്ങളല്ല. ഏതു കാലത്തിലും ഏതു സാഹചര്യത്തിലും അതു സംഭവിക്കാം. വ്യത്യസ്തമായ മൂന്നു പ്രണയങ്ങളുടെ കഥ പറയുകയാണ് ‘അനുരാഗം’. പ്രദര്‍ശനത്തിനൊരുങ്ങുന്ന ‘പ്രകാശന്‍ പറക്കട്ടെ’ എന്ന ചിത്രത്തിനുശേഷം ഷഹാദ് സംവിധാനം ചെയ്യുന്ന ചിത്രമാണ് അനുരാഗം. ഒരു കോമഡി ഫാമിലി ഡ്രാമയായിരിക്കും ചിത്രമെന്ന് സംവിധായകന്‍ ഷഹാദ് പറഞ്ഞു.
ക്വീന്‍ എന്ന ചിത്രത്തിലെ യുവാക്കള്‍ നെഞ്ചിലേറ്റിയ ‘നെഞ്ചിനകത്തു ലാലേട്ടന്‍’ എന്ന സൂപ്പര്‍ ഹിറ്റ് ഗാനത്തിലൂടെ ശ്രദ്ധേനായ അശ്വിന്‍ ജോസ് ആണ് അനുരാഗത്തിലെ കേന്ദ്ര കഥാപാത്രത്തെ അവതരിപ്പിക്കുന്നത്. അശ്വിന്‍ ജോസ് തന്നെയാണ് ചിത്രത്തിന്റെ തിരക്കഥാകൃത്തും. ലഷ്മി നാഥ് സത്യം സിനിമാസിന്റെ ബാനറില്‍ എന്‍. സുധീഷും, പ്രേമചന്ദ്രന്‍ .എജിയും ചേര്‍ന്നാണ് ചിത്രം നിര്‍മ്മിക്കുന്നത്. അനുരാഗത്തിന്റെ ചിത്രീകരണം കൊച്ചിയില്‍ ആരംഭിച്ചു. അശ്വിന്‍ ജോസ്, ഗൗരികൃഷ്ണന്‍ (96 ഫെയിം), മൂസി എന്നിവരും ഏതാനും പുതുമുഖങ്ങളും അണിനിരക്കുന്ന രംഗമായിരുന്നു ആദ്യം ചിത്രീകരിച്ചത്. കൊച്ചി മറൈന്‍ ഡ്രൈവായിരുന്നു ലൊക്കേഷന്‍.
സംവിധായകന്‍ ഗൗതം മേനോനും ഷീലയും ഈ ചിത്രത്തിലെ വളരെ നിര്‍ണ്ണായകമായ രണ്ട് കഥാപാത്രങ്ങളെ അവതരിപ്പിക്കുന്നു. ജോണി ആന്റണി, ലെന, ദുര്‍ഗാ കൃഷ്ണ , ജാഫര്‍ ഇടുക്കി, സുധീഷ്, മണികണ്ഠന്‍ പട്ടാമ്പി എന്നിവരാണ് മറ്റഭിനേതാക്കള്‍. മനു മഞ്ജിത്തിന്റെ വരികള്‍ക്ക് ജോയല്‍ ജോണ്‍സ് ഈണം പകര്‍ന്നിരിക്കുന്നു. തമിഴ് സിനിമകളിലൂടെ ശ്രദ്ധേയനായ സുരേഷ് ഗോപിയാണ് ചിത്രത്തിന്റെ ഛായാഗ്രാഹകന്‍.
Recent Comments