ഒരേ പേരിലുള്ള സിനിമകള്‍ അനൗണ്‍സ് ചെയ്യുകയും പിന്നീട് അതില്‍ ഒന്നിന്റെ പേരു മാറ്റേണ്ടി വന്നിട്ടുള്ള നിരവധി സിനിമകള്‍ ഉണ്ടായിട്ടുണ്ട്. ഈ നിരയിലെ പുതിയ ടൈറ്റിലായിരുന്നു ഒറ്റക്കൊമ്പന്‍. ഈ പേരില്‍ രണ്ടു മാസത്തെ ഇടവേളയില്‍ പ്രഖ്യാപിക്കപ്പെട്ട രണ്ടു ചിത്രങ്ങള്‍. സുരേഷ് ഗോപി നായകനാകുന്ന ചിത്രവും മഹേഷ് പാറയില്‍ സംവിധാനം ചെയ്യുന്ന ചിത്രത്തിന്റെയും പേരുകള്‍ ഒറ്റക്കൊമ്പന്‍ എന്നായിരുന്നു. പക്ഷെ മഹേഷ് സംവിധാനം ചെയ്യുന്ന ചിത്രത്തിന്റെ പേര് ഏകദന്ത എന്ന് മാറ്റിയിരിക്കുകയാണ് അതിന്റെ അണിയറക്കാര്‍.
വന്യമായ പ്രദേശത്ത് ഇടഞ്ഞു നില്‍ക്കുന്ന ഒറ്റക്കൊമ്പുള്ള ആനയുടെ ചിത്രമാണ് ‘ഏകദന്ത’ എന്ന ടൈറ്റില്‍ പോസ്റ്ററില്‍ കാണുന്നത്.
ഹ്രസ്വചിത്രങ്ങളിലൂടെയും വെബ്‌സീരീസുകളിലൂടെയും ശ്രദ്ധേയനായ മഹേഷ് പാറയില്‍ ആദ്യമായി സംവിധാനം ചെയ്യുന്ന ചിത്രമാണ് ‘ഏകദന്ത’. ഷിമോഗ ക്രിയേഷന്‍സിന്റെയും ഡ്രീം സിനിമാസിന്റെയും ബാനറില്‍ ഷബീര്‍ പത്തന്‍, നിധിന്‍ സെയ്‌നു മുണ്ടക്കല്‍, എന്നിവര്‍ ചേര്‍ന്നാണ് ചിത്രത്തിന്റെ നിര്‍മാണം. ബാദുഷ എന്‍.എം ആണ് പ്രൊജക്ട് ഡിസൈനര്‍.
മലയാള മുന്‍നിര താരങ്ങള്‍ അഭിനയിക്കുന്ന ചിത്രത്തിന്റെ കൂടുതല്‍ വിവരങ്ങള്‍ ഉടന്‍ അറിയിക്കുമെന്ന് സംവിധായകന്‍ മഹേഷ് പറഞ്ഞു. ഒരു കൊമേഴ്സ്യല്‍ ചിത്രത്തിന് വേണ്ട എല്ലാ ചേരുവകളും ചിത്രത്തില്‍ ഉണ്ടാകുമെന്ന് അണിയറ പ്രവര്‍ത്തകര്‍ പറയുന്നു. ഇടുക്കി, വയനാട്, തൊടുപുഴ എന്നിവിടങ്ങളാണ് ചിത്രത്തിന്റെ പ്രധാന ലൊക്കേഷനുകള്‍. കോവിഡ് മാനദണ്ഡങ്ങള്‍ പാലിച്ച് അടുത്ത വര്‍ഷം ആദ്യം ചിത്രീകരണം ആരംഭിക്കും.
കാടിന്റെ പശ്ചാത്തലത്തില്‍ ഒരുങ്ങുന്ന ചിത്രത്തിന്റെ കഥയും തിരക്കഥയും ഒരുക്കിയിരിക്കുന്നത് നിജയ്‌ഘോഷ് നാരായണനാണ്. അര്‍ജുന്‍ രവിയാണ് ഛായാഗ്രാഹകന്‍. മ്യൂസിക്ക് & ബിജിഎം ഒരുക്കുന്നത് രതീഷ് വേഗയാണ്. എഡിറ്റര്‍- പി.വി.ഷൈജല്‍, പ്രൊഡക്ഷന്‍ കണ്‍ട്രോളര്‍- റിച്ചാര്‍ഡ്, കലാസംവിധാനം- ദിലീപ് നാഥ്, കോസ്റ്റ്യൂം ഡിസൈനര്‍ – അക്ഷയ പ്രേംനാഥ്, മേക്കപ്പ്- രാജേഷ് നെന്മാറ, സ്റ്റില്‍സ്- ഗോകുല്‍ ദാസ്, പി.ആര്‍.ഒ- പി.ശിവപ്രസാദ്, പബ്ലിസിറ്റി ഡിസൈന്‍- സഹീര്‍ റഹ്മാന്‍ എന്നിവരാണ് മറ്റ് അണിയറ പ്രവര്‍ത്തകര്‍.
Recent Comments