പ്രേക്ഷക പ്രീതിയും നിരൂപക പ്രശംസയും ഒരുപോലെ നേടിയ റോജിന്‍ തോമസ് ചിത്രമായിരുന്നു ‘ഹോം’. ചിത്രത്തിലെ കേന്ദ്ര കഥാപാത്രമായ ഇന്ദ്രന്‍സിന്റെ അഭിനയത്തിനും മികച്ച പ്രതികരണങ്ങളാണ് ലഭിച്ചത്. ആമസോണ്‍ പ്രൈമില്‍ റിലീസ് ചെയ്ത ചിത്രത്തിന് കേരളത്തിന് പുറമെ മറ്റ് ഭാഷകളിലെ പ്രേക്ഷകര്‍ക്കിടയിലും സ്വീകാര്യത നേടിയിരുന്നു. ഇപ്പോഴിതാ ഹോം ഹിന്ദിയിലേക്ക് റീമേക്ക് ചെയ്യുകയാണെന്ന് നിര്‍മ്മാതാവ് വിജയ് ബാബു അറിയിച്ചിരിക്കുകയാണ്.
വിജയ് ബാബു നിര്‍മ്മിച്ച അങ്കമാലി ഡയറീസ് ഹിന്ദിയിലേക്ക് റീമേക്ക് ചെയ്ത അബന്‍ടന്‍ഷ്യ എന്റര്‍ടെയിന്‍മെന്റാണ് ഹോം റീമേക്ക് ചെയ്യുന്നത്. ഷേര്‍ണി, ശകുന്ദള ദേവി, എയര്‍ലിഫ്റ്റ്, ടോയിലറ്റ്, ഏക് പ്രേം കഹാനി എന്നീ ചിത്രങ്ങളുടെ നിര്‍മ്മാതാക്കളാണ് അബന്‍ടന്‍ഷ്യ എന്റര്‍ടെയിന്‍മെന്റ്.
അങ്കമാലി ഡയറീസിന് ശേഷം വീണ്ടും അബന്‍ടന്‍ഷ്യ എന്റര്‍ടെയിന്‍മെന്റുമായി പ്രവര്‍ത്തിക്കാന്‍ സാധിക്കുന്നതില്‍ സന്തോഷമുണ്ടെന്നും, ഹിന്ദി റീമേക്കിലൂടെ ചിത്രം കൂടുതല്‍ പ്രേക്ഷകരിലേക്ക് എത്തുമെന്നും വിജയ് ബാബു ഫേസ്ബുക്കില്‍ കുറിച്ചു. അതേസമയം ഹോം എന്ന വളരെ പ്രസക്തവും മനോഹരവുമായി സിനിമ റീമേക്ക് ചെയ്യാന്‍ അവസരം ലഭിച്ചതില്‍ അതിയായ സന്തോഷമുണ്ടെന്ന് അബന്‍ടന്‍ഷ്യ എന്റര്‍ടെയിന്‍മെന്റ് സിഇഓ വിക്രം മല്‍ഹോത്ര പറഞ്ഞു. ഇന്നത്തെ സമൂഹത്തില്‍ വളരെ പ്രസ്‌കതമായ കഥയാണ് ഹോം പറയുന്നത്. അങ്കമാലി ഡയറീസിന് ശേഷം വീണ്ടും ഫ്രൈഡേ ഫിലിം ഹൗസുമായി സിനിമ ചെയ്യാന്‍ സാധിച്ചതില്‍ സന്തുഷ്ടനാണെന്നും അദ്ദേഹം കൂട്ടിച്ചേര്‍ത്തു.
Recent Comments