‘ഉയരെ’യ്ക്കുശേഷം എസ് ക്യൂബ് ഫിലിംസ് നിര്‍മ്മിക്കുന്ന ചിത്രമാണ് ‘ജാനകി ജാനേ’. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു. ചിത്രത്തിലെ കേന്ദ്രകഥാപാത്രങ്ങളായ സൈജു കുറുപ്പും നവ്യാനായരുമാണ് പോസ്റ്ററിലുള്ളത്. അനീഷ് ഉപാസനയാണ് ചിത്രം തിരക്കഥയെഴുതി സംവിധാനം ചെയ്തിരിക്കുന്നത്. ചിത്രീകരണം പൂര്‍ത്തിയായ സിനിമയുടെ പോസ്റ്റ് പ്രൊഡക്ഷന്‍ വര്‍ക്കുകള്‍ പുരോഗമിക്കുന്നു. വിഷുവിന് ചിത്രം തീയേറ്ററുകളില്‍ പ്രദര്‍ശനത്തിനെത്തും.
സൈജു കുറുപ്പിനെയും നവ്യാനായരെയും കൂടാതെ ഷറഫുദ്ദീന്‍, ജോണി ആന്റണി, കോട്ടയം നസീര്‍, അനാര്‍ക്കലി മരക്കാര്‍, ജോര്‍ജ് കോര, ധ്യാന്‍ ശ്രീനിവാസന്‍ എന്നിവരും ചിത്രത്തില്‍ അഭിനയിക്കുന്നു.
പ്രശസ്ത നിര്‍മ്മാതാവ് പി.വി. ഗംഗാധരന്റെ മക്കളായ ഷെനുഗ, ഷെഗ്‌ന, ഷെര്‍ഗ എന്നിവരുടെ ഉടമസ്ഥതയിലുള്ളതാണ് എസ് ക്യൂബ് ഫിലിംസ്. ബോബി സഞ്ജയുടെ തിരക്കഥയില്‍ മനു അശോകന്‍ സംവിധാനം ചെയ്ത ഉയരെയാണ് ഈ ബാനറില്‍ നിര്‍മ്മിച്ച ആദ്യ ചിത്രം. പാര്‍വ്വതി തിരുവോത്തും ആസിഫ് അലിയും ടൊവിനോ തോമസുമായിരുന്നു ചിത്രത്തിലെ കേന്ദ്രകഥാപാത്രങ്ങളെ അവതരിപ്പിച്ചത്. ഗൃഹലക്ഷ്മി പ്രൊഡക്ഷന്‍സ് അവതരിപ്പിക്കുന്ന ചിത്രം വിതരണം ചെയ്യുന്നത് കല്‍പ്പകയാണ്. റത്തീനയാണ് എക്‌സിക്യൂട്ടീവ് പ്രൊഡ്യൂസര്‍. ഹാരിസ് ദേശം ലൈന്‍ പ്രൊഡ്യൂസറുമാണ്.
Recent Comments