പൃഥ്വിരാജ് നായകനായ ഷാജി കൈലാസ് ചിത്രം ‘കടുവ’ തീയേറ്റര്‍ കളക്ഷന്‍സില്‍ റെക്കോര്‍ഡ് നേട്ടം സൃഷ്ടിച്ചിരിക്കുന്നു. പുറത്തിറങ്ങി നാല് ദിവസം കൊണ്ട് തന്നെ 25 കോടിയോളമാണ് ചിത്രം നേടിയെടുത്തത്. പൃഥ്വിയുടെ കരിയറിലെ ഏറ്റവും വലിയ ഹിറ്റായി മാറിയിരിക്കുകയാണ് കടുവ. പൃഥ്വിയുടെ അടുപ്പിച്ചുള്ള നാലാമത്തെ ബ്ലോക്ക്ബസ്റ്റര്‍ ചിത്രം കൂടിയാണിത്. (അയ്യപ്പനും കോശിയും, ഡ്രൈവിംഗ് ലൈസന്‍സ്, ജനഗണമന, കടുവ. ഇതിനിടെ പുറത്തിറങ്ങിയ മൂന്ന് ചിത്രങ്ങള്‍ ഭ്രമവും കുരുതിയും കോള്‍ഡ് കേസും ഒടിടി റിലീസായിരുന്നു.) ലിസ്റ്റിന്‍ സ്റ്റീഫന്റെ മാജിക് ഫ്രെയിംസും സുപ്രിയ മേനോന്റെ പൃഥ്വിരാജ് പ്രൊഡക്ഷന്‍സും ചേര്‍ന്ന് സൃഷ്ടിച്ച തുടര്‍ച്ചയായ മൂന്നാമത്തെ ഹിറ്റ് ചിത്രവും. ജനഗണമനയും ഡ്രൈവിംഗ് ലൈസന്‍സുമാണ് ഈ ബാനറില്‍ നിര്‍മ്മിച്ച മറ്റ് രണ്ട് ചിത്രങ്ങള്‍. ഈ കൂട്ടുകെട്ടില്‍ നാലാമതൊരു ചിത്രംകൂടി ഒരുങ്ങുന്നുണ്ട്. അത് അല്‍ഫോന്‍സ്പുത്രന്‍ സംവിധാനം ചെയ്യുന്ന ഗോള്‍ഡാണ്.
ബക്രീദിന്റെ അവധിയായതിനാല്‍ ഗള്‍ഫ് മേഖലകളിലും ചിത്രത്തിന് ഗംഭീര വരവേല്‍പ്പാണ് ലഭിച്ചുകൊണ്ടിരിക്കുന്നത്. പൃഥ്വിയുടെ തന്നെ ഏറ്റവും വലിയ ഹിറ്റ് ചിത്രമായ ‘ജനഗണമന’ എട്ടു ദിവസം കൊണ്ട് നേടിയ കളക്ഷന്‍ ആണ് നാലു ദിവസം കൊണ്ട് കടുവ നേടിയെടുത്തത്. മാറാതെ പെയ്യുന്ന മഴയിലും കടുവ കാണാനുള്ള പ്രേക്ഷകരുടെ ഒഴുക്കാണ് കേരളത്തിലെ തീയറ്ററുകളില്‍ ഇപ്പോഴുള്ളത്.
Recent Comments