നവാഗതനായ മനോജ് വാസുദേവ് സംവിധാനം ചെയ്ത ചിത്രമാണ് ഖജ് രാഹോ ഡ്രീംസ്. ചിത്രം ഏപ്രിലില്‍ പ്രദര്‍ശനത്തിനെത്താന്‍ ഒരുങ്ങുകയാണ്.
അര്‍ജുന്‍ അശോകന്‍, ധ്രുവന്‍, ശ്രീനാഥ് ഭാസി, ഷറഫുദ്ദീന്‍, അതിഥി രവി എന്നിവരാണ് ഈ ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിച്ചത്. ജോണി ആന്റണി, സോഹന്‍ സീനുലാല്‍, സാദിഖ്, വര്‍ഷാ വിശ്വനാഥ്, നേഹ സക്‌സേന എന്നിവരും പ്രധാന താരങ്ങളാണ്.
സമൂഹത്തിലെ വ്യത്യസ്ത തലങ്ങളില്‍ ബന്ധപ്പെട്ടു പ്രവര്‍ത്തിക്കുന്ന നാലു ചെറുപ്പക്കാര്‍. ഇവര്‍ക്കിടയിലേയ്ക്ക് ലോല എന്ന പെണ്‍കുട്ടി കടന്നെത്തുകയാണ്. ലിംഗഭേദമില്ലാതെ സൗഹൃദം പങ്കിടുകയും സ്വാതന്ത്ര്യം അതിന്റെ പാരമ്യതയില്‍ ആഘോഷിക്കുകയും ചെയ്യുന്ന പെണ്‍കുട്ടിയാണ് ലോല. മധ്യ പ്രദേശിലെ ഖജ് രാഹോ ക്ഷേത്രത്തിനോട് ചേര്‍ന്നുള്ള ഒരു ഗ്രാമത്തിന്റെ പ്രത്യേകതകള്‍ അറിഞ്ഞ് അവിടേയ്ക്ക് യാത്ര തിരിക്കുകയാണ് അഞ്ചംഗ സംഘം. യാത്രയ്ക്കിടയില്‍ ഒട്ടനവധി തടസ്സങ്ങള്‍ അവര്‍ക്ക് നേരിടുന്നുണ്ട്. അതിനെയൊക്കെ തരണം ചെയ്ത് അവര്‍ ഖജുരാഹോയില്‍ എത്തുന്നതോടെ കഥ പുതിയ വഴിത്തിരിവിലേക്ക് നീങ്ങുകയാണ്.
സേതുവാണ് കഥയും തിരക്കഥയും സംഭാഷണവും എഴുതുന്നത്. ഗുഡ് ലൈന്‍ പ്രൊഡക്ഷന്‍സിന്റെ ബാനറില്‍ എം.കെ. നാസര്‍ ചിത്രം നിര്‍മ്മിക്കുന്നു. പ്രദീപ് നായര്‍ ഛായാഗ്രഹണവും ലിജോ പോള്‍ എഡിറ്റിംഗും നിര്‍വ്വഹിക്കുന്ന ചിത്രത്തിന്റെ പ്രൊഡക്ഷന്‍ കണ്‍ട്രോളര്‍ എന്‍.എം. ബാദുഷയാണ്. പി.ആര്.ഒ. വാഴൂര്‍ ജോസ്.
Recent Comments