പൊലീസ് സ്റ്റേഷന്‍ അത്ര മോശം സ്ഥലമൊന്നുമല്ല എന്ന ടാഗ് ലൈനോടെ ഒരുങ്ങുന്ന ചിത്രമാണ് കിറ്ക്കന്‍. നവാഗതനായ ജോഷാണ് ഈ ചിത്രം തിരക്കഥയെഴുതി സംവിധാനം ചെയ്യുന്നത്. മേജര്‍ രവി, ജോണ്‍ റോബിന്‍സണ്‍, ജയറാം കൈലാസ് എന്നിവരുടെ കീഴില്‍ സംവിധായ സഹായിയായിരുന്നു ജോഷ്.
കുറച്ചു നാളുകള്‍ക്കു മുമ്പ് കോട്ടയത്തു നടന്ന ഒരു യഥാര്‍ത്ഥ സംഭവമാണ് ഈ ചിത്രത്തിനാധാരം. ആത്മഹത്യാക്കുറിപ്പ് എഴുതിവച്ച ശേഷം മരണത്തെ വരിച്ച ഒരു പെണ്‍കുട്ടിയുടെ പോസ്റ്റ്‌മോര്‍ട്ടം റിപ്പോര്‍ട്ടിലുണ്ടായ സംശയമാണ് പൊലീസിനെ ഒരു പുനരന്വേഷണത്തിന് പ്രേരിപ്പിച്ചത്. തുടര്‍ന്നുണ്ടാകുന്ന വഴിത്തിരിവുകളാണ് ചിത്രത്തിലൂടെ അവതരിപ്പിക്കുന്നത്. ത്രില്ലറാണ് ചിത്രം.
ഔള്‍ മീഡിയാ എന്റെര്‍ടൈന്‍മെന്റിന്റെ ബാനറില്‍ അജിത് നായരും ബിന്ധ്യ അജീഷും ചേര്‍ന്നാണ് ഈ ചിത്രം നിര്‍മ്മിക്കുന്നത്. ഏ.ആര്‍. കണ്ണനാണ് ലൈന്‍ പ്രൊഡ്യൂസര്‍.
കിറ്ക്കന്റെ ചിത്രീകരണം വടക്കഞ്ചേരി, നെന്മാറ, പോത്തുണ്ടി ഡാം എന്നിവിടങ്ങളിലായി പുരോഗമിക്കുന്നു. ഇതിലെ ഭൂരിഭാഗം രംഗങ്ങളും ചിത്രീകരിക്കുന്നതും ഒരു പൊലീസ് സ്റ്റേഷനിലാണ്.
സലിംകുമാര്‍, വിജയരാഘവന്‍, മഖ്ബൂല്‍ സല്‍മാന്‍, ജോണി ആന്റണി, അനാര്‍ക്കലി മരക്കാര്‍, കനികുസൃതി, അഭിജ എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു. മുപ്പതോളം പുതുമുഖതാരങ്ങളും ഈ ചിത്രത്തിന്റെ പിന്നണിയിലുണ്ട്. ഇവര്‍ക്കായി പ്രത്യേക പരിശീലനവും നല്‍കിയിരുന്നു.
ചെമ്പന്‍ വിനോദിന്റെ സഹോദരന്‍ ഉല്ലാസ് ചെമ്പന്റേതാണ് കഥ. സംഗീതം മണികണ്ഠന്‍ അയ്യപ്പനും ഛായാഗ്രഹണം ഗൗതം ലെനിനും നിര്‍വ്വഹിക്കുന്നു. എഡിറ്റിംഗ് രോഹിത് വി.എസ്. കലാസംവിധാനം സന്തോഷ് വെഞ്ഞാറമൂട്. മേക്കപ്പ് സുനില്‍ നാട്ടക്കല്‍, കോസ്റ്റ്യം ഡിസൈന്‍ ഇന്ദ്രന്‍സ് ജയന്‍, ആക്ഷന്‍ മാഫിയാ ശശി, അസ്സോസ്സിയേറ്റ് ഡയറക്ടര്‍ അമല്‍ വ്യാസ്, പ്രൊഡക്ഷന്‍ കണ്‍ട്രോളര്‍ ഡി. മുരളി. വാര്‍ത്താപ്രചാരണം വാഴൂര്‍ ജോസ്. സ്റ്റില്‍സ് ജയപ്രകാശ് അതളൂര്‍.
Recent Comments