ഷൈന്‍ ടോം ചാക്കോ, ദിവ്യപിള്ള, ആത്മീയ രാജന്‍, ലാല്‍ജോസ് തുടങ്ങിയവരെ കേന്ദ്ര കഥാപാത്രങ്ങളാക്കി ആര്‍.എ. ഷഫീര്‍ സംവിധാനം ചെയ്യുന്ന ചിത്രമാണ് നിമ്രോദ്. ചിത്രത്തിന് ഷാര്‍ജയില്‍ വര്‍ണ്ണശബളമായ തുടക്കം. ഷാര്‍ജയിലെ സഫാരി മാളായിരുന്നു വേദി. അഭിനേതാക്കളും അണിയറ പ്രവര്‍ത്തകരും ഉള്‍പ്പെടെ വലിയൊരു സംഘം ചടങ്ങിന് സാക്ഷികളായി. കേരളീയത്തനിമ വിളിച്ചോതുന്ന വാദ്യമേളങ്ങളും ദുബായിലെ വിവിധ സംഘാടനകളില്‍നിന്നുള്ള കലാകാരന്മാരുടെ കലാപരിപാടികളും കോര്‍ത്തിണക്കിയാണ് ചടങ്ങ് സംഘടിപ്പിച്ചത്. ചെണ്ട കൊട്ടിയും നൃത്തച്ചുവട് വച്ചും ഷൈന്‍ ടോം ചാക്കോ ചടങ്ങിന് മോടി പകര്‍ന്നു. ‘നിമ്രോദി’നു വേണ്ടി പ്രത്യേകമായി ചിത്രീകരിച്ച പ്രൊമോ സോങ്ങ് വേദിയില്‍ പ്രദര്‍ശിപ്പിച്ചു. നിര്‍മ്മാതാക്കളായ മഹാ സുബൈര്‍, നൗഷാദ് ആലത്തൂര്‍, നടി പ്രാച്ചി പ്രഹ്ലാന്‍ എന്നിവരും ചടങ്ങില്‍ സന്നിഹിതരായിരുന്നു.
‘യു.എ.ഇയില്‍ എന്റെ മൂന്നു ചിത്രങ്ങള്‍ ഷൂട്ട് ചെയ്തിട്ടുണ്ട്. അറബിക്കഥ, ഡയമണ്ട് നെക്ലേസ്, മ്യാവു. പക്ഷേ അപ്പോഴൊന്നും ഇത്രയും ഗംഭീരമായൊരു ചടങ്ങ് നടത്താന്‍ കഴിഞ്ഞിട്ടില്ല. തീര്‍ച്ചയായും ഈ ചിത്രത്തിന്റെ അണിയറ പ്രവര്‍ത്തകര്‍ ഏറെ അഭിനന്ദനമര്‍ഹിക്കുന്നു.’ ലാല്‍ ജോസ് തന്റെ മറുപടി പ്രസംഗത്തില്‍ പറഞ്ഞു.
സിറ്റി ടാര്‍ഗറ്റ് എന്റര്‍ടൈന്‍മെന്റിന്റെ ബാനറില്‍ അഗസ്റ്റിന്‍ ജോസഫാണ് നിമ്രോദ് നിര്‍മ്മിക്കുന്നത്.
ജനുവരി ഒന്നിന് ചിത്രത്തിന്റെ ഷൂട്ടിംഗ് പാലക്കാട് ആരംഭിക്കും. ജോര്‍ജിയാണ് മറ്റൊരു പ്രധാന ലൊക്കേഷന്‍. പി.ആര്‍.ഒ. വാഴൂര്‍ ജോസ്.
Recent Comments