സോഷ്യല്‍ മീഡിയ താരങ്ങളായ ഹാഷിര്‍, സാഫ് ബോയ്, ജോമോന്‍ ജ്യോതിര്‍, സിജു സണ്ണി, അലന്‍, വിനായക്, അജിന്‍ ജോയ് എന്നിവരെ കേന്ദ്ര കഥാപാത്രങ്ങളാക്കി ആനന്ദ് മേനോന്‍ സംവിധാനം നിര്‍വഹിച്ച ‘വാഴ-ബയോപിക് ഓഫ് എ ബില്ല്യണ്‍ ബോയ്സ്’ന് എങ്ങും മികച്ച പ്രതികരണം.
ഒരുകൂട്ടം ചെറുപ്പക്കാരുടെ ജീവിതസാഹചര്യങ്ങളും മാനസികസങ്കര്‍ഷങ്ങളും നര്‍മ്മം കലര്‍ന്ന മുഹൂര്‍ത്തങ്ങളിലൂടെ അവതരിപ്പിച്ച ചിത്രം പ്രേക്ഷക ഹൃദയങ്ങളില്‍ ചിരിമഴ പെയ്യിക്കുകയാണ്. ‘തങ്കലാന്‍’, ‘നുണക്കുഴി’, തുടങ്ങി മുന്‍നിര താരങ്ങളുടെ ചിത്രങ്ങളോടൊപ്പം പുതുമുഖങ്ങളെ അണിനിരത്തിയ വാഴ തിയറ്ററുകളില്‍ ഇടം പിടിക്കുമ്പോള്‍ ചിത്രം കേരളത്തിന് പുറത്തും ഗംഭീര അഭിപ്രായം നേടി പ്രദര്‍ശനം തുടരുകയാണ്. കുട്ടികള്‍, യുവാക്കള്‍, കുടുംബ പ്രേക്ഷകര്‍ തുടങ്ങി പ്രായഭേദമന്യേ ഏതൊരാള്‍ക്കും ആസ്വദിക്കാന്‍ സാധിക്കും വിധമാണ് ചിത്രം ഒരുക്കിയിരിക്കുന്നത്.
‘ജയ ജയ ജയ ജയഹേ’, ‘ഗുരുവായൂര്‍ അമ്പലനടയില്‍’ എന്നീ ബ്ലോക്ക്ബസ്റ്റര്‍ ചിത്രങ്ങളുടെ സംവിധായകനായ വിപിന്‍ ദാസാണ് ഈ ചിത്രത്തിന്റെ തിരക്കഥാകൃത്ത്. അദ്ദേഹത്തിന്റെ മുന്‍ ചിത്രങ്ങളില്‍ നിന്നും വ്യത്യസ്തത പുലര്‍ത്തി എത്തിയ ചിത്രം പ്രേക്ഷകര്‍ക്ക് സമ്മാനിക്കുന്നത് കിടിലന്‍ തിയറ്റര്‍ എക്‌സ്പീരിയന്‍സാണ്.
നീരജ് മാധവ് നായകനായെത്തിയ ‘ഗൗതമന്റെ രഥം’ത്തിന് ശേഷം ആനന്ദ് മേനോന്‍ സംവിധാനം ചെയ്ത സിനിമയാണ് ‘വാഴ-ബയോപിക് ഓഫ് എ ബില്ല്യണ്‍ ബോയ്സ്’. WBTS പ്രൊഡക്ഷന്‍സ്, ഇമാജിന്‍ സിനിമാസ്, ഐക്കണ്‍ സ്റ്റുഡിയോസ്, സിഗ്‌നചര്‍ സ്റ്റുഡിയോസ് എന്നീ ബാനറില്‍ വിപിന്‍ ദാസ്, ഹാരിസ് ദേശം, പി ബി അനീഷ്, ആദര്‍ശ് നാരായണ്‍ എന്നിവര്‍ ചേര്‍ന്നാണ് ചിത്രം നിര്‍മ്മിച്ചത്.
Recent Comments