ഊട്ടിയിലെ റെയില്‍വെ റസ്റ്റ് ഹൗസില്‍വച്ച് കാമുകനെ കൊന്ന് കഷണങ്ങളാക്കി സ്യൂട്ട് കെയിസില്‍ നിറച്ച സംഭവത്തിന് (ജൂലൈ 12) 26 വര്‍ഷം പിന്നിടുന്നു. പയ്യന്നൂര്‍ സ്വദേശിയും സിവില്‍ കോണ്‍ട്രാക്ടറുമായിരുന്ന മുരളീധരനാണ് കൊല്ലപ്പെട്ടത്. കേസുമായി ബന്ധപ്പെട്ട് പയ്യന്നൂര്‍ സ്വദേശിനിയായ ഡോ. ഓമന പൊലീസ് പിടിയിലായെങ്കിലും ജാമ്യത്തിലറങ്ങി മുങ്ങുകയായിരുന്നു.
ഊട്ടി പൊലീസും കേരളാ പൊലീസും നിരന്തരമായി അന്വേഷണം നടത്തിയെങ്കിലും ഡോ. ഓമനയെ ഇതുവരെയും കണ്ടെത്താനായിട്ടില്ല. ലേഡി സുകുമാരക്കുറുപ്പ് എന്ന പേരില്‍ അറിയപ്പെട്ട ഡോ ഓമനയുടെ ജീവിതം പ്രമേയമാക്കിയാണ് സിനിമ ഒരുങ്ങുന്നത്.
യെസ് ബീ സിനിമാസിന്റെ ബാനറില്‍ ‘സീറോ ഡിഗ്രി’ സംവിധാനം ചെയ്യുന്നത് എഴുത്തുകാരനായ സുജിത്ത് ബാലകൃഷ്ണനാണ്.
സൂര്യനെല്ലി പെണ്‍കുട്ടിയുടെ ജീവിതം അടിസ്ഥാനമാക്കി ഇംഗ്ലീഷില്‍ രചിച്ച നോവല്‍ അടക്കം നിരവധി ഗ്രന്ഥങ്ങളുടെ കര്‍ത്താവാണ് സുജിത്ത് ബാലകൃഷ്ണന്‍. മലയാളത്തിലും തമിഴിലുമായാണ് ചിത്രം നിര്‍മ്മിക്കുന്നത്. മലയാളത്തിലെ മുന്‍നിര നടി നായികയാവുന്ന ചിത്രത്തില്‍ തമിഴ് നടന്മാരും ഭാഗമാവും. ഡിസംബറില്‍ ചിത്രീകരണം ആരംഭിക്കുന്ന ചിത്രത്തിന്റെ ലൊക്കേഷന്‍ ഊട്ടിയും ബിഹാറുമാണ്. താരനിര്‍ണയം ഉടന്‍ പൂര്‍ത്തിയാകുമെന്ന് സംവിധായകന്‍ സുജിത്ത് ബാലകൃഷ്ണന്‍ അറിയിച്ചു. പി.ആര്‍.ഒ. പി.ആര്‍.സുമേരന്‍.
Recent Comments