ടൊവിനോ തോമസ് നായകനാകുന്ന നടികര് തിലകത്തിന്റെ പേരില്‍ മാറ്റം വരുത്തി അണിയറ പ്രവര്‍ത്തകര്‍. നടികര് എന്നാണ് ചിത്രത്തിന്റെ പുതിയ പേര്. അമ്മ സംഘടനക്ക് അയച്ച കത്തില്‍ ‘നടികര് തിലകം ശിവാജി സമൂഗ നള പേരവൈ’ എന്ന സംഘടന ചിത്രത്തിന്റെ പേര് മാറ്റുവാന്‍ അപേക്ഷിച്ചിരുന്നു. ഇത് സംബന്ധിച്ച് ചില ചര്‍ച്ചകളും നടന്നിരുന്നു.
ശിവാജിഗണേശന്റെ മകനും നടനുമായ പ്രഭു ലൊക്കേഷനില്‍ വച്ച് നടന്‍ ലാലിനോട് നടികര് തിലകം എന്ന പേരില്‍ ഒരു സിനിമ നടക്കുന്നുണ്ടെന്നും അതിനെക്കുറിച്ച് അന്വേഷിക്കണമെന്നും ആവശ്യപ്പെട്ടു. അപ്പോള്‍ ലാല്‍ തന്നെയാണ് തന്റെ മകനാണ് ആ ചിത്രം സംവിധാനം ചെയ്യുന്നതെന്ന് പറഞ്ഞത്. തമിഴ് മക്കള്‍ അച്ഛനെ ആരാധനയോടെ വിശിഷിപ്പിച്ചിരുന്ന നടികര് തിലകം എന്ന പേര് മാറ്റിയാല്‍ കൊള്ളാം എന്നൊരു അഭിപ്രായം പ്രഭു ലാലുമായി പങ്കുവച്ചു. ആ സ്‌നേഹപൂര്‍വ്വമായ ആവശ്യത്തിന് വഴങ്ങാന്‍ ലാലും തയ്യാറാവുകയായിരുന്നു. ഇക്കാര്യം ലാല്‍ മകനുമായി ചര്‍ച്ച ചെയ്തിരുന്നു. അതിന് ശേഷമാണ് നടികര് എന്ന പേര് മാറ്റം ഉണ്ടാകുന്നത്.
ഈ പേരുമാറ്റല്‍ ചടങ്ങില്‍ പങ്കുകൊള്ളാന്‍ പ്രഭു തന്നെ കൊച്ചിയില്‍ നേരിട്ട് എത്തുകയും ചെയ്തു. അദ്ദേഹം തന്നെയാണ് ആ പോസ്റ്റര്‍ പുറത്തിറക്കിയതും.
ടോവിനോ നായകനാകുന്ന ചിത്രത്തില്‍ ഭാവനയാണ് നായിക. ടൊവിനോയ്ക്കൊപ്പം മറ്റൊരു പ്രധാന കഥാപാത്രത്തെ അവതരിപ്പിക്കുന്നത് സൗബിന്‍ ഷാഹിറാണ്. ബാല എന്ന കഥാപാത്രത്തെയാണ് സൗബിന്‍ ചിത്രത്തില്‍ അവതരിപ്പിക്കുന്നത്. ടൊവിനോയും സൗബിനും ആദ്യമായി ഒന്നിക്കുന്ന ചിത്രമെന്ന പ്രത്യേകതയും നടികര് എന്ന ചിത്രത്തിനുണ്ട്.
ഡ്രൈവിംഗ് ലൈസന്‍സ് എന്ന ഹിറ്റ് ചിത്രത്തിന് ശേഷം ലാല്‍ ജൂനിയറാണ് നടികര് സംവിധാനം ചെയ്യുന്നത്. അലന്‍ ആന്റണി, അനൂപ് വേണുഗോപാല്‍ എന്നിവരുടെ നേതൃത്വത്തിലുള്ള ഗോഡ്സ്പീഡാണ് ചിത്രത്തിന്റെ നിര്‍മ്മാതാക്കള്‍. മൈത്രി മൂവി മെക്കേഴ്സും നിര്‍മ്മാണ പങ്കാളിയാണ്.
ധ്യാന്‍ ശ്രീനിവാസന്‍, അനൂപ് മേനോന്‍, ഷൈന്‍ ടോം ചാക്കോ, ലാല്‍, ബാലു വര്‍ഗീസ്, സുരേഷ് കൃഷ്ണ, സംവിധായകന്‍ രഞ്ജിത്ത്,ഇന്ദ്രന്‍സ്, മധുപാല്‍, ഗണപതി, വിജയ് ബാബു, അല്‍ത്താഫ് സലിം, മണിക്കുട്ടന്‍, മേജര്‍ രവി, മൂര്‍, സുമിത്, നിഷാന്ത് സാഗര്‍, അഭിറാം പൊതുവാള്‍, ചന്ദു സലിംകുമാര്‍, ശ്രീകാന്ത് മുരളി, അര്‍ജുന്‍ നന്ദകുമാര്‍, ദിവ്യ പിള്ള, ജോര്‍ഡി പൂഞ്ഞാര്‍, ദിനേശ് പ്രഭാകര്‍, അബു സലിം, ബൈജുക്കുട്ടന്‍, ഷോണ്‍ സേവ്യര്‍, തുഷാര പിള്ള, ദേവി അജിത്, സ്മിനു സിജോ, കൃഷ്ണ സംഗീത്, ലെച്ചു (ബിഗ് ബോസ് ഫെയിം), രജിത്ത് (ബിഗ് ബോസ് ഫെയിം), തിരക്കഥാകൃത്ത് ബിപിന്‍ ചന്ദ്രന്‍, ചെമ്പില്‍ അശോകന്‍, മാലാ പാര്‍വതി, ദേവികാ ഗോപാല്‍ നായര്‍, ബേബി ആരാധ്യ, ജയരാജ് കോഴിക്കോട്, അഖില്‍ കണ്ണപ്പന്‍, ഖയസ് മുഹമ്മദ്, ബേബി വിയ എന്നിവരും ചിത്രത്തില്‍ അഭിനയിക്കുന്നുണ്ട്.
Recent Comments