തെലുങ്ക് യുവതാരം നാഗ ചൈതന്യയുടെ കരിയറിലെ ഏറ്റവും വലിയ ചിത്രം എന്ന നിലയില്‍ പ്രീ റിലീസ് പബ്ലിസിറ്റി നേടിയ ചിത്രമായിരുന്നു തണ്ടേല്‍. സായി പല്ലവിയാണ് ചിത്രത്തിലെ നായിക. ചന്ദു മൊണ്ടെറ്റി തിരക്കഥയും സംവിധാനവും നിര്‍വ്വഹിച്ച ചിത്രം ഫെബ്രുവരി 7 നാണ് തിയറ്ററുകളില്‍ എത്തിയത്. റൊമാന്റിക് ആക്ഷന്‍ ഗണത്തില്‍ പെടുന്ന ചിത്രമാണിത്. ഇപ്പോഴിതാ ചിത്രത്തിന്റെ ഒടിടി റിലീസ് തീയതി ഔദ്യോഗികമായി പ്രഖ്യാപിച്ചിരിക്കുകയാണ്.
ചിത്രത്തിന്റെ ഒടിടി റൈറ്റ്‌സ് നെറ്റ്ഫ്‌ളിക്‌സ് സ്വന്തമാക്കിയെന്ന് നേരത്തേ റിപ്പോര്‍ട്ടുകള്‍ വന്നിരുന്നു. 50 കോടി രൂപയാണ് ഒടിടി റൈറ്റ്‌സ് ഇനത്തില്‍ നിര്‍മ്മാതാക്കള്‍ക്ക് ലഭിച്ചത് എന്നായിരുന്നു റിപ്പോര്‍ട്ട്. മാര്‍ച്ച് 14 ന് ചിത്രം നെറ്റ്ഫ്‌ളിക്‌സില്‍ എത്തുക എന്നായിരുന്നു നേരത്തെ അറിയിച്ചിരുന്നത്. ഇപ്പോഴിതാ നെറ്റ്ഫ്‌ളിക്‌സിന്റെ ഔദ്യോഗിക പ്രഖ്യാപനം വന്നിക്കുകയാണ്. നേരത്തെ പ്രഖ്യാപിച്ചതിനേക്കാള്‍ ഒരാഴ്ച നേരത്തെ, അതായത് മാര്‍ച്ച് 7 ന് ചിത്രം സ്ട്രീമിംഗ് ആരംഭിക്കും. തെലുങ്കിന് പുറമെ ഹിന്ദി, തമിഴ്, കന്നഡ, മലയാളം ഭാഷകളിലും ചിത്രം എത്തും.
ആഗോള ബോക്‌സ് ഓഫീസില്‍ നിന്ന് ചിത്രം 100 കോടിയോളം ലഭിച്ച ചിത്രത്തിന്റെ നിര്‍മ്മാണച്ചെലവ് 75 കോടിയായിരുന്നു. തീരദേശവും മത്സ്യത്തൊഴിലാളികളുടെ ജീവിതവുമൊക്കെ പശ്ചാത്തലമാക്കുന്ന ചിത്രമാണിത്. മത്സ്യത്തൊഴിലാളിയായ രാജു എന്ന കഥാപാത്രമായാണ് നാഗചൈതന്യ സ്‌ക്രീനില്‍ എത്തുന്നത്.
Recent Comments