ഷാജൂണ്‍ കാര്യാല്‍ സംവിധാനം ചെയ്യുന്ന ‘മൃദുഭാവേ ദൃഢകൃത്യേ’യുടെ ഫസ്റ്റ് ലുക്ക് പോസ്റ്റര്‍ ദേശീയ അവാര്‍ഡ് ജേതാവായ ഗായിക നഞ്ചിയമ്മ റിലീസ് ചെയ്തു. പാലക്കാട് ധോണിയിലെ ലീഡ്‌സ് കോളേജില്‍ ഫസ്റ്റ് ക്ലാപ്പ് സംഘടിപ്പിച്ച ത്രിദിന സിനിമ പരിശീലന ക്യാമ്പില്‍ വെച്ചാണ് നഞ്ചിയമ്മ പോസ്റ്റര്‍ റിലീസ് ചെയ്തത്.
നാട്ടിന്‍ പുറത്തെ അഭ്യസ്തവിദ്യരായ ഒരു കൂട്ടം സുഹൃത്തുക്കളുടെ ജീവിതത്തിലുണ്ടാവുന്ന അസാധാരണ സംഭവവികാസങ്ങളാണ് ചിത്രത്തിന്റെ ഇതിവൃത്തം. ടെലിവിഷന്‍ പരമ്പരകളിലൂടെ കുടുംബ പ്രേക്ഷകര്‍ക്ക് പ്രിയങ്കരനായ സൂരജ് സണ്‍ ആണ് നായകന്‍. ശ്രവണ, മരിയ പ്രിന്‍സ് എന്നിവരാണ് നായികമാര്‍. തട്ടും പുറത്ത് അച്ചുതന്‍, ഏതം തുടങ്ങിയ ചിത്രങ്ങളില്‍ നായികയായിരുന്നു ശ്രവണ. ഡബ്‌സ്മാഷ്, ഷോട്ട് ഫിലിംസ്, നാടകങ്ങള്‍ എന്നിവയിലൂടെ ശ്രദ്ധേയയായ മരിയ പ്രിന്‍സ് ഇപ്പോള്‍ സിനിമകളിലും സജീവമാണ്. സുരേഷ് കൃഷ്ണ, അനില്‍ ആന്റോ, ദിനേശ് പണിക്കര്‍, സീമ ജി. നായര്‍, മായാമേനോന്‍, ജീജ സുരേന്ദ്രന്‍, ശിവരാജ്, ഹരിത്, വിഷ്ണു വിദ്യാധരന്‍, അമല്‍ ഉദയ്, സിദ്ധാര്‍ത്ഥ് രാജന്‍, ജുനൈറ്റ് അലക്‌സ് ജോര്‍ഡി, മനൂപ് ജനാര്‍ദ്ധനന്‍, ദേവദാസ്, ആനന്ദ് ബാല്‍, അങ്കിത് മാധവ്, വിജയ് ഷെട്ടി, രാജേഷ് കുറുമാലി, വിമല്‍ ഫസ്റ്റ് ക്ലാപ്പ്, ഡോ. സുനില്‍, ദീപക് ജയപ്രകാശന്‍ എന്നിവര്‍ മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.
ഫൈഡ്രോ എയര്‍ ടെക്ടോണിക്‌സ് പ്രൈവറ്റ് ലിമിറ്റഡിന്റെ ബാനറില്‍ ഡോ. വിജയ്ശങ്കര്‍ മേനോനാണ് ചിത്രം നിര്‍മ്മിക്കുന്നത്. ഡോ. വിജയ്ശങ്കര്‍ മേനോന്റെ കഥയ്ക്ക് നവാഗതരായ രവി തോട്ടത്തില്‍ തിരക്കഥയും രാജേഷ് കുറുമാലി സംഭാഷണവും ഒരുക്കുന്നു. സഹസ്ര എക്‌സ്പര്‍ടൈസാണ് സഹനിര്‍മ്മാതാക്കള്‍. സന്ദീപ് മേനോനും സുധീപ് മേനോനും എക്‌സിക്യൂട്ടീവ് പ്രൊഡ്യൂസേഴ്‌സാണ്. പി.ആര്‍.ഒ. ശാന്തകുമാര്‍, സുജീഷ് കുന്നുമ്മക്കര.
കാസര്‍ഗോഡ്, ഒറ്റപ്പാലം, മുംബൈ, എറണാകുളം എന്നിവിടങ്ങളിലായി ചിത്രീകരിച്ച മൃദു ഭാവേ ദൃഢ കൃത്യേ വൈകാതെ തിയേറ്ററുകളിലെത്തും.
Recent Comments