‘ജോ & ജോ’യ്ക്ക് ശേഷം അരുണ്‍ ഡി. ജോസ് സംവിധാനം ചെയ്ത ചിത്രമാണ് 18+. ഷൂട്ടിംഗ് പൂര്‍ത്തിയായ ചിത്രം ജൂലൈ ആദ്യവാരം പ്രദര്‍ശനത്തിനെത്തും.
യുവതാരം നെസ്ലിന്‍ ആദ്യമായി നായകനായി പ്രദര്‍ശനത്തിനെത്തുന്ന ചിത്രം കൂടിയാണ് 18+. റൊമാന്റിക് കോമഡി ഡ്രാമയാണ് ചിത്രം. മീനാക്ഷി ദിനേഷാണ് നായിക. സാഫ് ബ്രോസ്, ബിനു പപ്പു, മാത്യു തോമസ്, രാജേഷ് മാധവന്‍, മനോജ് കെ.യു., ശ്യാം മോഹന്‍, കുമാര്‍ സുനില്‍, ബാബു അന്നൂര്‍, നിഖില വിമല്‍ എന്നിവരാണ് മറ്റ് അഭിനേതാക്കള്‍.
കഴിഞ്ഞ പന്ത്രണ്ട് വര്‍ഷമായി മലയാളസിനിമയിലെ മുന്‍നിര സംവിധായകര്‍ക്കൊപ്പം ചീഫ് അസോസിയേറ്റായി പ്രവര്‍ത്തിച്ചിട്ടുള്ള ചെറുപ്പക്കാരനാണ് അരുണ്‍ ഡി. ജോസ്. ജോ & ജോ നല്‍കിയ ജനപ്രിയത തന്നെയാണ് യുവതാരങ്ങളെ കേന്ദ്രകഥാപാത്രമാക്കി 18+ സംവിധാനം ചെയ്യാന്‍ തനിക്ക് പ്രചോദനമായതെന്നും അരുണ്‍ കാന്‍ ചാനലിനോട് പറഞ്ഞു.
‘എന്റെയൊരു സുഹൃത്ത് കൂടിയായ രാജേഷ് വരിക്കോലി പറഞ്ഞ ത്രെഡില്‍നിന്നാണ് ഈ സിനിമയുടെ പ്ലോട്ട് ഞാന്‍ കണ്ടെത്തുന്നത്. യുവതലമുറയെ ഇന്നത്തെ സമൂഹം എങ്ങനെ പരിഗണിക്കുന്നുവെന്നാണ് ഈ ചിത്രം പറയാതെ പറയുന്ന സന്ദേശം. ഞാനും രവീഷ് നാഥും ചേര്‍ന്നാണ് ചിത്രത്തിന് തിരക്കഥയും സംഭാഷണവും എഴുതുന്നത്.’ ജോസ് പറഞ്ഞു.
ഫലൂദ എന്റര്‍ടെയിന്‍മെന്റ്‌സ്, റീല്‍സ് മാജിക്ക് എന്നീ ബാനറുകളില്‍ അനുമോദ് ബോസ്, മനോജ് മേനോന്‍, ഡോ. ജിനി കെ. ഗോപിനാഥ്, ജി. പ്രജിത്ത് എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. സതീഷ് കുറുപ്പ് ഛായാഗ്രഹണം നിര്‍വ്വഹിക്കുന്ന ചിത്രത്തിന്റെ പ്രൊഡക്ഷന്‍ കണ്‍ട്രോളര്‍ ഷാഫി ചെമ്മാടാണ്. ശശികുമാര്‍, സുഹൈല്‍, വൈശാഖ് സുഗുണന്‍ എന്നിവരുടെ വരികള്‍ക്ക് ക്രിസ്റ്റോ സേവ്യര്‍ സംഗീതം നിര്‍വ്വഹിക്കുന്നു. മദനോത്സവം എന്ന ചിത്രത്തിലൂടെ ശ്രദ്ധേയനായ സംഗീത സംവിധായകനാണ് ക്രിസ്റ്റോ സേവ്യര്‍.
Recent Comments