നിമിഷ സജയനും റോഷന്‍ മാത്യുവും നായികയും നായകനുമായി ഒരു ചിത്രം അണിയറയിലൊരുങ്ങുന്നു. ടൈറ്റില്‍ ആയിട്ടില്ല. ആഗസ്റ്റില്‍ ആലപ്പുഴയില്‍ ചിത്രീകരണം തുടങ്ങും.
ഫ്രൈഡേയ്ക്ക് ശേഷം ലിജിന്‍ ജോസും നജീം കോയയും ഒരുമിക്കുന്നു എന്ന പ്രത്യേകതകൂടി ഈ ചിത്രത്തിനുണ്ട്. നജീംകോയയുടെ തിരക്കഥയില്‍ ലിജിന്‍ജോസ് സംവിധാനം ചെയ്ത ചിത്രമായിരുന്നു ഫഹദ് ഫാസില്‍ നായകനായ ഫ്രൈഡേ. ഈ ചിത്രത്തിലൂടെയാണ് വിജയ്ബാബുവും സാന്ദ്രാതോമസും മലയാളസിനിമയുടെ മുന്‍നിര നിര്‍മ്മാതാക്കളായി മാറുന്നത്. പിന്നീട് ഫ്രൈഡേ ഫിലിംസ് എന്ന പ്രൊഡക്ഷന്‍ കമ്പനിയുടെ ബാനറിലാണ് ഇരുവരും സിനിമകള്‍ ചെയ്തിരുന്നത്.
ഒരു ദിവസം നടക്കുന്ന വ്യത്യസ്ത കഥാസന്ദര്‍ഭങ്ങളിലൂടെയാണ് ഫ്രൈഡേ എന്ന ചിത്രം പുരോഗമിക്കുന്നതെങ്കില്‍ പുതിയ സിനിമയുടെ കഥപറച്ചില്‍ ഇതിവൃത്തംകൊണ്ടുതന്നെ ഏറെ ശ്രദ്ധേയമാകാന്‍ ഇടയുണ്ട്. നിമിഷയുടെയും റോഷന്റെയും അഭിനയജീവിതത്തില്‍ ഏറ്റവും കരുത്തുറ്റ കഥാപാത്രങ്ങളാകുമെന്നും കരുതേണ്ടിവരും.
ലൈന്‍ ഓഫ് കളേഴ്‌സിന്റെ ബാനറില്‍ എം.സി. അരുണാണ് ഈ ചിത്രം നിര്‍മ്മിക്കുന്നത്. ബിനുകുമാറും രതീഷ് സുകുമാരനുമാണ് എക്‌സിക്യൂട്ടീവ് പ്രൊഡ്യൂസേഴ്‌സ്. ജനകന്‍, സാന്റ്‌വിച്ച്, ഡേവിഡ് ആന്റ് ഗോലിയാത്ത്, ഡോള്‍ഫിന്‍, കാറ്റും മഴയും എന്നീ ചിത്രങ്ങളുടെ നിര്‍മ്മാതാവാണ് അരുണ്‍.
അലക്‌സ് പുളിക്കന്‍ ഛായാഗ്രഹണം നിര്‍വ്വഹിക്കുന്ന ചിത്രത്തിന്റെ കലാസംവിധായകന്‍ ബാവയും പ്രൊഡക്ഷന്‍ കണ്‍ട്രോളര്‍ സേതു അടൂരുമാണ്.
Recent Comments