യുവ താരങ്ങളായ നിവിന്‍ പോളി, ആസിഫ് അലി എന്നിവരെ പ്രധാന കഥാപാത്രങ്ങളാക്കി എബ്രിഡ് ഷൈന്‍ ഒരുക്കിയ മഹാവീര്യര്‍ എന്ന ചിത്രത്തിലെ ലിറിക്കല്‍ വീഡിയോ റിലീസായി. ബി.കെ. ഹരിനാരായണന്റെ വരികള്‍ക്ക് ഈണം പകര്‍ന്നിരിക്കുന്നത് ഇഷാന്‍ ചാബ്രയാണ്. വിദ്യാധരന്‍ മാസ്റ്ററും ജീവന്‍ പത്മകുമാറും ചേര്‍ന്നാണ് ഈ ഗാനം ആലപിച്ചിരിക്കുന്നത്. ആലാപന വൈവിധ്യംകൊണ്ട് ഇതിനോടകംതന്നെ ആ ഗാനം ശ്രദ്ധിക്കപ്പെട്ടുകഴിഞ്ഞു.
1983, ആക്ഷന്‍ ഹീറോ ബിജു, പൂമരം, കുങ്ഫു മാസ്റ്റര്‍ എന്നിവക്ക് ശേഷം എബ്രിഡ് ഷൈന്‍ ഒരുക്കുന്ന ചിത്രമാണ് മഹാവീര്യര്‍. പ്രശസ്ത സാഹിത്യകാരന്‍ എം. മുകുന്ദന്‍ രചിച്ച കഥയെ ആസ്പദമാക്കി ഒരുക്കിയ ഈ ചിത്രത്തിന് തിരക്കഥ എഴുതിയിരിക്കുന്നതും എബ്രിഡ് ഷൈനാണ്.
പോളി ജൂനിയര്‍ പിക്ചേഴ്സിന്റെ ബാനറില്‍ നിവിന്‍ പോളിയും ഇന്ത്യന്‍ മൂവി മേക്കേഴ്‌സിന്റെ ബാനറില്‍ ഷംനാസും ചേര്‍ന്നാണ് മഹാവീര്യര്‍ നിര്‍മ്മിച്ചിരിക്കുന്നത്. ലാല്‍, ഷാന്‍വി ശ്രീവാസ്തവ, സിദ്ദിഖ്, ലാലു അലക്‌സ്, വിജയ് മേനോന്‍, കൃഷ്ണ പ്രസാദ്, മേജര്‍ രവി, സുധീര്‍ കരമന, മല്ലിക സുകുമാരന്‍, സൂരജ് എസ് കുറുപ്പ്, പദ്മരാജന്‍, കലാഭവന്‍ പ്രജോദ്, സുധീര്‍ പറവൂര്‍, പ്രമോദ് വെളിയനാട്, ഷൈലജ പി. അമ്പു എന്നിവരും അഭിനയിച്ചിട്ടുണ്ട്.
ഫാന്റസിയും കോമഡിയും ടൈം ട്രാവലും കോടതിയും നിയമ വ്യവഹാരങ്ങളും ഇടകലര്‍ത്തി ഒരുക്കിയ ചിത്രമാണ് ‘മഹാവീര്യര്‍’. ചിത്രത്തിലെ ഓരോ കഥാപാത്രങ്ങളുടെ വ്യത്യസ്തമാര്‍ന്ന ഗെറ്റപ്പും ഇതിന്റെ ഹൈലൈറ്റാണ്. സംസ്ഥാന അവാര്‍ഡ് ജേതാവായ ചന്ദ്രു സെല്‍വരാജാണ് ഛായാഗ്രഹകന്‍. വാര്‍ത്താപ്രചരണം എ.എസ്. ദിനേശ്.
Recent Comments