ലിസ്റ്റിന്‍ സ്റ്റീഫന്‍ നിര്‍മിച്ച് ഡിജോ ജോസ് സംവിധാനം ചെയ്യുന്ന പുതിയ ചിത്രത്തിന്റെ പാലക്കാട് ലൊക്കേഷനിലായിരുന്നു നിവിപോളി. ഇതിനിടെ നിവിനെതേടി ഒരു ദുഃഖ വാര്‍ത്ത എത്തി. ഉറ്റസുഹൃത്തായ നെവിന്‍ ചെറിയാന്റെ മരണവാര്‍ത്തയായിരുന്നു അത്. ബാല്യകാല സുഹൃത്തുക്കളാണ് ഇരുവരും. അസുഖ ബാധിതനായി ചികിത്സയിലായിരുന്നു നെവിന്‍. ഇന്ന് രാവിലെ അന്ത്യം സംഭവിക്കുകയായിരുന്നു. വിപ്രോ ടെക്‌നോളജിസില്‍ സോഫ്റ്റ് വെയര്‍ എന്‍ജിനീയറായിരുന്നു.
ശവസംസ്‌കാര ചടങ്ങില്‍ നിവിനും പങ്കെടുത്തു. ആലുവ സെയ്ന്റ് ഡൊമിനിക് കത്തോലിക്ക പള്ളി സെമിത്തേരിയിലായിരുന്നു സംസ്‌കാര ചടങ്ങുകള്‍. അന്ത്യചുംബനം നല്‍കിയാണ് ആത്മ സുഹൃത്തിന് നിവിന്‍ വിട നല്‍കിയത്. സെമിത്തേരിയിലേക്ക് എടുക്കുമ്പോള്‍ ശവമഞ്ചം പിടിക്കുകയും ചെയ്തു. അത്രമാത്രം ദൃഢമായിരുന്നു അവരുടെ സൗഹൃദം. നിറകണ്ണുകളോടെയാണ് നിവിന്‍ സെമിത്തേരിയില്‍ നിന്ന് പോയത്.
ജന്മദിനത്തില്‍ തന്നെ ഇത്തരമൊരു ദുഃഖം നേരിടേണ്ടി വന്നതില്‍ ആരാധകരും അവരുടെ ദുഃഖം സോഷ്യല്‍ മീഡിയയില്‍ പങ്കുവെച്ചു. വേര്‍പാട് നികത്താന്‍ കഴിയില്ലെങ്കിലും മരണം കൊണ്ട് അവസാനിക്കാത്ത ഇരുവരുടെയും സൗഹൃദം അനശ്വരതയിലേക്ക് നീളട്ടേ എന്ന് പ്രത്യാശിക്കാം.
Recent Comments