അമിത വണ്ണത്തെച്ചൊല്ലി ഏറെ പഴികേട്ട താരമാണ് നിവിന്‍പോളി. എന്നാല്‍ കഴിഞ്ഞ ദിവസങ്ങളില്‍ നിവിന്‍പോളിക്കൊപ്പമുള്ള ചിത്രങ്ങള്‍ ചില ആരാധകര്‍ പുറത്തുവിട്ടത് സോഷ്യല്‍മീഡിയയില്‍ വൈറലായിരുന്നു. പഴയതുപോലെ നിവിന്‍ മെലിഞ്ഞ് സുന്ദരനായിരിക്കുന്നു.
ഏറ്റവും ഒടുവിലായി പുറത്തിറങ്ങിയ നിവിന്‍പോളിയുടെ റോഷന്‍ ആന്‍ഡ്രൂസ് ചിത്രവും പരാജയമായിരുന്നു. ബോഡിഷെയ്മിംഗിനൊപ്പം തുടരെയള്ള പരാജയങ്ങളും നിവിനെ മാറി ചിന്തിപ്പിക്കാന്‍ പ്രേരിപ്പിച്ചിരിക്കണം. തുടര്‍ന്നാണ് പ്രകൃതി ചികിത്സ തേടി അദ്ദേഹം കൊല്ലത്തെത്തിയത്. 15 കിലോയോളമാണ് ശരീരഭാരം കുറച്ചത്. തന്റെ ട്രാന്‍സ്ഫര്‍മേഷന്റെ പുതിയ ചിത്രങ്ങളൊന്നും നിവിന്‍ പുറത്തുവിട്ടിരുന്നില്ല. എന്നാല്‍ ന്യൂ ഇയര്‍ ആഘോഷിക്കാന്‍ കുടുംബത്തോടൊപ്പം ദുബായിലെത്തിയപ്പോള്‍ അവിടെയുള്ള ആരാധകര്‍ നിവിനൊപ്പമുള്ള ചിത്രങ്ങള്‍ പകര്‍ത്തിയിരുന്നു. അതാണിപ്പോള്‍ പുറത്ത് വന്നിരിക്കുന്നത്. നിവിന്റെ രൂപമാറ്റത്തെ സിനിമാക്കാരടക്കം അത്യാഹ്ലാദത്തോടെയാണ് ഏതിരേറ്റിരിക്കുന്നത്. ഇത് കുറച്ചുമുമ്പേ ആകാമായിരുന്നു എന്ന് അഭിപ്രായപ്പെട്ടവരുമുണ്ട്.
നല്ല ഭക്ഷണപ്രിയനാണ് നിവിന്‍പോളി. അതിനനുസരിച്ച് വര്‍ക്കൗട്ട് ചെയ്തിരുന്നില്ല. അതാണ് നിവിന്റെ അമിത ഭാരത്തിന് കാരണമായി സുഹൃത്തുക്കള്‍പോലും പറഞ്ഞിരുന്നത്. ശരീരം മെലിഞ്ഞ സ്ഥിതിക്ക് ഇനി വര്‍ക്ക്ഔട്ട് മുടക്കരുതെന്ന് ഉപദേശിക്കുന്നവരും ഏറെയാണ്.
ഹനീഫ് അദേനി തിരക്കഥയെഴുതി സംവിധാനം ചെയ്യുന്ന ചിത്രത്തിലാണ് നിവിന്‍പോളി ഇനി ജോയിന്‍ ചെയ്യുന്നത്. ദുബായാണ് ചിത്രത്തിന്റെ പ്രധാന ലൊക്കേഷന്‍. എട്ടാംതീയതി ഷൂട്ടിംഗ് തുടങ്ങും. ഇപ്പോള്‍ ദുബായിലുള്ള നിവിന്‍ അദേനിയുടെ ചിത്രത്തില്‍ പങ്കെടുത്തശേഷമാവും നാട്ടിലേയ്ക്ക് എത്തുക. കേരളത്തിലും പത്ത് ദിവസത്തെ ഷൂട്ടുണ്ട്. മിഖായേലാണ് നിവിന്‍ അഭിനയിച്ച ഹനീഫ് അദേനി ചിത്രം.
നിവിന്‍പോളിയെ കൂടാതെ വിനയ് ഫോര്‍ട്ട്, ബാലു വര്‍ഗീസ്, ജാഫര്‍ ഇടുക്കി, ഗണപതി, സാനി ഇയ്യപ്പന്‍ തുടങ്ങിയവരും ചിത്രത്തില്‍ അഭിനയിക്കുന്നു. പോളി ജൂനിയേഴ്‌സിന്റെയും മാജിക് ഫ്രെയിംസിന്റെയും ബാനറില്‍ നിവിന്‍പോളിയും ലിസ്റ്റിന്‍ സ്റ്റീഫനും ചേര്‍ന്നാണ് ചിത്രം നിര്‍മ്മിക്കുന്നത്. ഹാരിസ് ദേശമാണ് ലൈന്‍ പ്രൊഡ്യൂസര്‍. വിഷ്ണു തട്ടാശ്ശേരിയാണ് ക്യാമറാമാന്‍.
Recent Comments