ലോകമെമ്പാടുമുള്ള സിനിമാ പ്രേമികളില്‍ നിന്നും വന്‍ സ്വീകരണമാണ് പൊന്നിയിന്‍ സെല്‍വത്തിന്റെ രണ്ടാം ഭാഗത്തിനും ലഭിച്ചിരിക്കുന്നത്. ബോക്‌സ് ഓഫീസ് കളക്ഷന്‍ റിപ്പോര്‍ട്ടുകള്‍ അത് വ്യക്തമാക്കുന്നു. ഒന്നാം ഭാഗമായ ‘പിഎസ് 1 ‘- നേക്കാള്‍ സാമ്പത്തിക വിജയവും പ്രേക്ഷകപ്രീതിയും നേടി വിജയ കുതിപ്പ് തുടരുകയാണ് ‘പി എസ് 2’. റിലീസ് ചെയ്ത് രണ്ടാം ദിവസം പിന്നിടുമ്പോള്‍ ആഗോള തലത്തില്‍ നൂറു കോടി പിന്നിട്ട് പുതിയ ചരിത്രം സൃഷ്ടിച്ചിരിക്കയാണ് ‘പിഎസ് 2’.
നോര്‍ത്ത് അമേരിക്കയില്‍ പ്രീമിയര്‍ ഷോ ഉള്‍പ്പെടെ രണ്ട് ദിവസത്തെ ഗ്രോസ് കളക്ഷന്‍ മാത്രം 2.5 മില്ല്യന്‍ ഡോളറിന് മുകളിലാണെന്ന് നിര്‍മ്മാതാക്കളായ ലൈക്കാ പ്രൊഡക്ഷന്‍സും മദ്രാസ് ടാക്കീസും തങ്ങളുടെ ട്വിറ്റര്‍ പേജിലൂടെ വെളിപ്പെടുത്തി. ലോകത്താകമാനമായി രണ്ടു ദിവസത്തെ ഗ്രോസ്സ് കളക്ഷന്‍ 109.6 കോടിയാണ്. ഇതോടെ ‘പി എസ് 2’വും നൂറു കോടി ക്ലബ്ബില്‍ ഇടം നേടിക്കഴിഞ്ഞു.
ഇന്ത്യയില്‍ മാത്രം രണ്ടു ദിവസത്തെ കളക്ഷന്‍ 57.9 കോടിയാണ്. ഇതില്‍ തമിഴ് നാട്ടിലെ കളക്ഷന്‍ മാത്രം 36 കോടിയിലേറെ വരും. കേരളത്തിലെ ഗ്രോസ്സ് 5.5 കോടിയാണെന്നാണ് കണക്കുകള്‍ സൂചിപ്പിക്കുന്നത്.
‘പി എസ് 1’ നെ അപേക്ഷിച്ച് ചടുലമായ കഥാ ഉള്ളടക്കം, ആഖ്യാനം, സാങ്കേതിക മികവ്, മണിരത്‌നത്തിന്റെ മാസ്മരികമായ ദൃശ്യാവിഷ്‌ക്കാര ചാരുത എന്നിവ കൊണ്ട് ആരാധകരെ വിസ്മയിപ്പിച്ചിരിക്കയാണ് ‘പിഎസ്2’. തമിഴ്, മലയാളം, തെലുങ്ക്, കന്നഡ, ഹിന്ദി എന്നീ അഞ്ച് ഭാഷകളിലാണ് ചിത്രം പ്രദര്‍ശനത്തിനെത്തിയത്.
വിക്രം, കാര്‍ത്തി, ജയം രവി, ഐശ്വര്യാ റായ് ബച്ചന്‍, തൃഷ കൃഷ്ണ, ശോഭിതാ ധൂലിപാല, ഐശ്വര്യ ലക്ഷ്മി, ജയചിത്ര, ജയറാം, റഹ്മാന്‍, പ്രഭു, ശരത് കുമാര്‍, പാര്‍ത്ഥിപന്‍,വിക്രം പ്രഭു ,ബാബു ആന്റണി, ലാല്‍, റിയാസ് ഖാന്‍, കിഷോര്‍ അശ്വിന്‍ കാകുമാനു, റിയാസ് ഖാന്‍, മോഹന്‍ റാം, എന്നിവരാണ് ‘പിഎസ്2 ‘ ലെ പ്രധാന അഭിനേതാക്കള്‍.
റഫീക്ക് അഹമ്മദും ഏ.ആര്. റഹ്മാനുമാണ് മലയാളം ‘പി എസ്-2 ‘ ന്റെ ഗാന ശില്പികള്‍. സംവിധായകന്‍ ശങ്കര്‍ രാമകൃഷ്ണനാണ് സംഭാഷണ രചയിതാവ്. രവി വര്‍മ്മന്‍ ഛായഗ്രഹണവും തോട്ടാധരണി കലാ സംവിധാനവും, ശ്രീകര്‍ പ്രസാദ് എഡിറ്റിങ്ങും നിര്‍വഹിച്ചിരിക്കുന്നു. പി.ആര്.ഒ. സി.കെ. അജയ് കുമാര്‍.
Recent Comments